17. Sexhdet në Kuran

Muhamed ibn Beshari na ka thënë: Na ka treguar Gunderi, e këtij i ka treguar Shuëbe, e ky nga Ebu Is'haku, e ky e ka dëgjuar Esvedin se Abdullahu (Allahu qoftë i kënaqur me të!) tregon: “Pejgamberi ﷺ e lexoi suren Nexhm, në Mekë, dhe ra në sexhde (gjatë leximit). Bashkë me të ranë edhe gjithë të pranishmit, përveç një plaku, i cili (duke ironizuar sexhden) mori një grusht me guralecë ose dhé, e ngriti në ballë dhe tha: “Më mjafton kjo. Më pas, e kam parë atë të vrarë si jobesimtar.”

Muhamed ibn Jusufi na ka thënë: Na ka treguar Sufjani, e ky nga Sad ibn Ibrahimi, e ky nga Abdurrahmani se Ebu Hurejra (Allahu qoftë i kënaqur me të!‎‎) tregon se ditën e premte, në namazin e sabahut, Pejgamberi ﷺ e lexonte suren Sexhde dhe suren Insan.

Sulejman ibn Harbi dhe Ebu Numani kanë thënë: Na ka treguar Hamadi, e ky nga Ejubi, e ky nga Ikrime se Ibn Abasi (Allahu qoftë i kënaqur me të!) tregon: “Surja Sad nuk përmban sexhde të obliguar (të leximit). Mirëpo, e kam parë Pejgamberin ﷺ duke rënë në sexhde gjatë leximit të saj.”

Hafs ibn Omeri na ka thënë: Na ka treguar Shuëbe, e ky nga Ebu Is'haku, e ky nga Esvedi se Abdullahu (Allahu qoftë i kënaqur me të!) tregon se Pejgamberi ﷺ e lexoi suren Nexhm dhe ra në sexhde. Asnjë i pranishëm nuk mbeti pa rënë në sexhde, përveç një burri, i cili mori një grusht me guralecë ose dhé, e ngriti në ballë dhe (duke ironizuar sexhden) tha: “Më mjafton kjo.”

Më vonë, pashë se i njëjti u vra si jobesimtar.

Musededi na ka thënë: Na ka treguar Abdulvarithi, e këtij i ka treguar Ejubi, e ky nga Ikrime se Ibn Abasi (Allahu qoftë i kënaqur me të!) tregon se Pejgamberi ﷺ bëri sexhde (për shkak të leximit) të sures Nexhm, e në atë rast bënë sexhde edhe të gjithë muslimanët, idhujtarët, xhinët dhe njerëzit.

Këtë e transmeton edhe Ibn Tahmani nga Ejubi.

Sulejman ibn Davud Ebu Rabiu na ka thënë: Na ka treguar Ismail ibn Xhaferi, e këtij i ka rrëfyer Jezid ibn Husajfe, e ky nga Ibn Kusajti, e këtij i ka rrëfyer Ata ibn Jesari se Zejd ibn Thabiti (Allahu qoftë i kënaqur me të!) tregon se ia lexoi Pejgamberit ﷺ suren Nexhm, porse (Pejgamberi ﷺ) nuk bëri sexhde.

Adem ibn Ebu Ijasi na ka thënë: Na ka treguar Ibn Ebu Dhiëbi, e këtij i ka treguar Jezid ibn Abdullah ibn Kusajti, e ky nga Ata ibn Jesari se Zejd ibn Thabiti (Allahu qoftë i kënaqur me të!) tregon: “Ia lexova Pejgamberit ﷺ suren Nexhm, por ai nuk bëri sexhde.”

Muslimi dhe Muadh ibn Fedale na kanë thënë: Na ka rrëfyer Hishami, e ky nga Jahjai se Ebu Seleme tregon: “E pashë Ebu Hurejrën (Allahu qoftë i kënaqur me të!) duke lexuar suren Inshikak e duke rënë në sexhde (gjatë leximit).” E pyeta:
- O Ebu Hurejre, a mos re në sexhde?
- Sikur të mos e kisha parë Pejgamberin ﷺ duke rënë, nuk do të kisha rënë as unë (në sexhde), - ma ktheu Ebu Hurejra.

Musededi na ka thënë: Na ka treguar Jahjai, e ky nga Ubejdullahu, e këtij i ka treguar Nafiu se Ibn Omeri (Allahu qoftë i kënaqur me të!) tregon: “Kur Pejgamberi ﷺ na lexonte ndonjë sure që përmbante ajet të sexhdes, binte në sexhde, e në atë rast binim në sexhde edhe ne të gjithë, saqë (ndonjëherë) vështirë mund të gjeje vend për ta vendosur ballin.”

Bishr ibn Ademi na ka thënë: Na ka treguar Ali ibn Mus'hiri, e këtij i ka rrëfyer Ubejdullahu, e ky nga Nafiu se Ibn Omeri (Allahu qoftë i kënaqur me të!) tregon se, ndërsa rrinim te Pejgamberi ﷺ, ndonjëherë e lexonte ajetin e sexhdes dhe binte në sexhde, e edhe ne të gjithë binim në sexhde pas tij. Dhe, për shkak të turmës së madhe, mezi gjenim vend për ta vendosur ballin.

Ibrahim ibn Musai na ka thënë: Na ka rrëfyer Hisham ibn Jusufi, e këtij i ka rrëfyer Ibn Xhurejxhi, e këtij i ka rrëfyer Ebu Bekër ibn Ebu Mulejke, e ky nga Othman ibn Abdurrahman Tejmiu, e ky nga Rebia ibn Abdullah Tejmiu, - Ebu Bekër (ibn Ebu Mulejke) ka thënë: Rebia ka qenë prej njerëzve më të mirë, - (Ibn Xhurejxhi ka thënë: Më ka rrëfyer Ebu Bekri e ky nga Othmani) se Rebia tregon se, ditën e xhuma, Omeri (Allahu qoftë i kënaqur me të!) lexoi në minber suren Nahl. Kur arriti tek ajeti i sexhdes, zbriti prej minberit dhe ra në sexhde, e bashkë me të edhe të pranishmit. Pastaj, në xhumanë vijuese, sërish e lexoi suren Nahl dhe, kur arriti tek ajeti i sexhdes, u tha njerëzve: “O ju njerëz! Kur lexohet ajeti i sexhdes, ai që bie në sexhde, ia ka qëlluar (së vërtetës), kurse ai që nuk bie, nuk ka bërë mëkat.”

Në këtë rast Omeri nuk e bëri sexhden.

(Ibn Xhurejxhi ka thënë: “Më ka rrëfyer Ebu Bekri, e ky nga) Nafiu shton nga Ibn Omeri se: “Allahu nuk na ka detyruar ta bëjmë sexhden, përveç nëse dëshirojmë.”

Musededi na ka thënë: Na ka treguar Muëtemiri, e ky e ka dëgjuar babanë e tij, e këtij i ka treguar Bekri se Ebu Rafiu tregon: “Një namaz të jacisë e fala me Ebu Hurejrën (Allahu qoftë i kënaqur me të!), i cili, gjatë namazit, lexoi suren Inshikak dhe bëri sexhde. E pyeta:

- Ç'është kjo?

- Kam bërë sexhde në këtë sure duke qenë mbrapa Ebu Kasimit ﷺ. Andaj, do ta vazhdoj këtë praktikë derisa ta takoj sërish (të vdes).”

Sadaka na ka thënë: Na ka rrëfyer Jahjai, e ky nga Ubejdullahu, e ky nga Nafiu se Ibn Omeri (Allahu qoftë i kënaqur me të!) tregon: “Kur Pejgamberi ﷺ na lexonte ndonjë sure që përmbante ajet të sexhdes, binte në sexhde, e në atë rast binim në sexhde edhe ne të gjithë, saqë (ndonjëherë) vështirë mund të gjeje vend për ta vendosur ballin.”