Sahihu i Buhariut — Hadithi 2014
1. Nënkapitulli: Vlera e Natës së Kadrit
Allahu Fuqiplotë ka thënë: “Ne e zbritëm atë (Kuranin) në Natën e Kadrit. E ç’të bëri ty të dish se ç’është Nata e Kadrit? Nata e Kadrit është më e vlefshme se një mijë muaj. Me lejen e Zotit të tyre në të (atë natë) zbresin melekët dhe shpirti (Xhibrili) për secilën çështje. Ajo është paqe deri në agim të mëngjesit.” (Kadr, 1-5) Ibn Ujejne ka thënë: "Kur përmendet në Kuran 'ma edrake?" "مَا أَدْرَاكَ" (E ç’të bëri ty të dish?), veçse ia ka bërë të ditur atij (sepse është në kohën e kryer). Ndërkaq, kur përmendet 'ma judrike?' "وَمَا يُدْرِيكَ" (E ç’të bën ty të dish), nuk ia ka bërë të ditur (sepse është në kohën e tashme).
2014. Nga: Ebu Hurejra
Ali ibn Abdullahu na ka thënë: Na ka treguar Sufjani, e ky e ka mbajtur mend nga Zuhriu, e ky nga Ebu Seleme se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kush agjëron Ramazanin, duke besuar dhe shpresuar në shpërblimin e Allahut, do t'i falen mëkatet e kaluara. Dhe, kush falet në Natën e Kadrit, duke besuar dhe shpresuar në shpërblimin e Allahut, do t'i falen mëkatet e kaluara.”
Këtë transmetim e fuqizon Sulejman ibn Kethiri nga Zuhriu.