Sahihu i Buhariut — Hadithi 2085
24. Nënkapitulli: Kamatëngrënësi, dëshmitari dhe shkruesi i kamatës
Allahu i Madhërishëm ka thënë: “Ata që hanë e marrin kamatë, pasurohen ashtu siç pasurohet ai, të cilin e ka prekur dhe e ka bërë të hutuar shejtani. Kjo ndodh për shkak se ata thoshin se tregtia është njëlloj – si kamata. Mirëpo, Allahu e ka lejuar tregtinë, kurse kamatën e ka ndaluar. E kujtdo që i vjen këshilla nga Zoti i tij e shmanget prej kamatës, malli i tij, i fituar më parë (para ndalimit të kamatës), është i tij. E, vendimi për këtë i takon Allahut. E, kushdo që i kthehet (marrjes së kamatës si shitblerje), ai do të shoqërohet me Zjarrin, në të cilin do të qëndrojë përgjithmonë.” (Bekare, 275)
2085. Nga: Semure ibn Xhundubi
Musa ibn Ismaili na ka thënë: Na ka treguar Xherir ibn Hazimi, e këtij i ka treguar Ebu Rexhai se Semure ibn Xhundubi (Allahu qoftë i kënaqur me të!) transmeton se Pejgamberi ﷺ ka thënë: “Mbrëmë pashë në ëndërr se dy njerëz më morën dhe më dërguan në Tokën e Shenjtë. Rrugëtuam derisa arritëm te një lumë gjaku. Në mes të lumit qëndronte një njeri në këmbë, kurse një tjetër në breg mbante ca gurë para vetes. Kur ai që ishte në lumë afrohej për të dalë, ky (nga bregu) e qëllonte me gur në gojë dhe e kthente aty ku ishte. Kështu vepronte me të sa herë që ky tentonte të dilte. Unë thashë: “Kush është ky?” Ata thanë: “Ai në lumë ishte njeriu që ka ngrënë kamatë!”