Sahihu i Buhariut — Hadithi 2253
7. Nënkapitulli: Parapagimi për një afat të caktuar
Kështu ka thënë edhe Ibn Abasi, Ebu Seidi, Esvedi dhe Haseni. Ibn Omeri ka thënë: "Nuk prish punë parapagimi i ushqimit të porositur me cilësi të caktuara, çmim të caktuar, për një afat të caktuar, përveç për të mbjellat të cilave nuk u janë paraqitur shenjat e pjekjes."
2253. Nga: Abdullah ibn Abasi
Ebu Nuajmi na ka thënë: Na ka treguar Sufjani, e ky nga Ibn Ebu Nexhihu, e ky nga Abdullah ibn Kethiri, e ky nga Ebu Minhali se Ibn Abasi (Allahu qoftë i kënaqur me të!) tregon: “Kur Pejgamberi ﷺ erdhi në Medinë, njerëzit i parapaguanin frutat për dy-tre vjet.” Pejgamberi ﷺ u tha: “Ai që parapaguan diçka, le të parapaguajë për sasi të caktuar, për një afat të caktuar.”
Abdullah ibn Velidi na ka thënë: “Na ka treguar Sufjani, e këtij i ka treguar Ibn Ebu Nexhihu se (Pejgamberi ﷺ ka thënë): “... për sasi dhe peshë të caktuar...”