Sahihu i Buhariut — Hadithi 2305
5. Nënkapitulli: Është i lejuar autorizimi i personit të pranishëm dhe atij që mungon
Abdullah ibn Amri i shkroi letër shërbëtorit të vet, sepse ndodhej larg, që ta japë zekatin e fitrit për gjithë familjen e tij, përfshirë të vegjlit e të rriturit.
2305. Nga: Ebu Hurejra
Ebu Nuajmi na ka thënë: Na ka treguar Sufjani, e ky nga Seleme, e ky nga Ebu Seleme se Ebu Hurejra (Allahu qoftë i kënaqur me të!) tregon se Pejgamberi ﷺ i kishte borxh dikujt një deve. Ai erdhi t'ia kërkojë borxhin dhe Pejgamberi ﷺ tha: “Jepjani (një deve)!” Kërkuan, por nuk gjetën deve të moshës së njëjtë, përveç një vit më të madhe. Pejgamberi ﷺ tha: “Jepjani atë!” Personi në fjalë tha: “Ma ktheve hakun tim tërësisht, Allahu ta ktheftë me të mirë!” Atëherë Pejgamberi ﷺ tha: “Më i miri prej jush është ai që e kthen huan në formën më të mirë.”