Sahihu i Buhariut — Hadithi 2408
19. Nënkapitulli: Ndalesa për shpërdorimin e pasurisë
Si dhe bllokimi i pasurisë dhe ndalesa e mashtrimit përkitazi me të.
Allahu i Madhërishëm ka thënë: “Por Allahu nuk e do shkatërrimin.” (Bekare, 205) “Allahu, me siguri që do ta prishë punën e ngatërrestarëve.” (Junus, 81) “... a mos vallë namazi yt urdhëron që ne t’i lëmë ato që i kanë adhuruar të parët tanë ose që të mos bëjmë me pasurinë tonë çfarë të duam?” (Hud, 87) “Pasurinë tuaj mos e lini në dorë të mendjelehtëve (të papjekurve)...” (Nisa, 5)
2408. Nga: Mugire ibn Shuëbe
Othmani më ka thënë: Na ka treguar Xheriri, e ky nga Mensuri, e ky nga Shabiu, e ky nga Verradi, i çrobëruari i Mugire ibn Shuëbes, se Mugire ibn Shuëbe (Allahu qoftë i kënaqur me të!) transmeton se Pejgamberi ﷺ ka thënë: “Allahu jua ka bërë haram mosrespektimin e nënave, varrosjen e bijave për së gjalli, privimin e të tjerëve nga pasuria dhe lypjen pa të drejtë, si dhe urren thashethemet, të pyeturit e shumtë dhe shpërdorimin e pasurisë.”