Sahihu i Buhariut — Hadithi 2609
25. Nënkapitulli: Kur dikujt i dhurohet një dhuratë duke qenë në shoqërimin e një grupi njerëzish, është më meritor ta marrë ai (e jo ta ndajë me shoqëruesit)
Përmendet se Ibn Abasi ka thënë se, pranuesi i dhuratës e ndan atë me shoqëruesit e vet. Por, e vërteta qëndron se kjo nuk është thënë nga Ibn Abasi.
2609. Nga: Ebu Hurejra
Ibn Mukatili na ka thënë: Na ka rrëfyer Abdullahu, e këtij i ka rrëfyer Shuëbe, e ky nga Seleme ibn Kuhejli, e ky nga Ebu Seleme se Ebu Hurejra (Allahu qoftë i kënaqur me të!) tregon se Pejgamberi ﷺ mori borxh një deve njëvjeçare dhe, kur pronari vajti t'ia kërkojë borxhin, sahabët u treguan të rreptë (për shkak të vrazhdësisë së tij me Pejgamberin ﷺ), por Pejgamberi ﷺ u tha: “Huadhënësi ka të drejtë ta kërkojë borxhin e tij sa herë të dojë.” Pastaj ia ktheu borxhin me një deve më të vjetër sesa që ia kishte marrë dhe tha: “Më i miri prej jush është ai që e kthen huan në formën më të mirë.”