Sahihu i Buhariut — Hadithi 2681
28. Nënkapitulli: Ai që urdhëron të përmbushet premtimi
Kështu ka vepruar Haseni. Allahu i Lartësuar ka thënë: “Trego në Libër për Ismailin! Vërtet, ai ishte i sinqertë në premtimet e veta...” (Merjem, 54) Ibn Eshvai ka urdhëruar përmbushjen e betimit dhe këtë veprim e ka përmendur nga Semure ibn Xhundubi. Misver ibn Mahremi ka thënë: "E kam dëgjuar Pejgamberin ﷺ. Pastaj përmendi dhëndrin e tij dhe tha: "Më ka premtuar dhe e ka përmbushur premtimin e dhënë." Ebu Abdullahu (Buhariu) ka thënë: "E kam parë Is’hak ibn Ibrahimin të argumentohet me hadithin e Ibn Eshvait."
2681. Nga: Abdullah ibn Abasi
Ibrahim ibn Hamzai më ka thënë: Na ka treguar Ibrahim ibn Sadi, e ky nga Salihu, e ky nga Ibn Shihabi, e ky nga Ubejdullah ibn Abdullahu se Abdullah ibn Abasi transmeton prej Sufjanit (Allahu qoftë i kënaqur me ta!) se Herakliu i ka thënë: “Të pyeta çfarë ju urdhëron, e më the se ju porosit ta falni namazin, të jeni të sinqertë dhe të ndershëm, ta përmbushni premtimin dhe ta mbani besën. Pastaj tha: “Kjo është cilësi e një pejgamberi.”