Sahihu i Buhariut — Hadithi 2741
1. Nënkapitulli: Testamenti
Pejgamberi ﷺ ka thënë: “Njeriu e lë testamentin e gatshëm me shkrim.” Allahu i Madhërishëm ka thënë: “Ju është urdhëruar që, nëse ndonjërit prej jush i afrohet vdekja dhe ka pasuri për të lënë pas, atëherë në mënyrë të drejtë të lërë testamentin për prindërit dhe farefisin; ky është detyrim për besimtarët e devotshëm. Kush e ndryshon testamentin pasi e ka dëgjuar, ta dijë se gjynahu është i rëndë për ata që e ndryshojnë! Sigurisht që Allahu i dëgjon dhe i di të gjitha. Kush i trembet ndonjë gabimi apo padrejtësie nga ana e lënësit të testamentit dhe e ndreq atë, ta dijë se nuk bën gjynah. Vërtet, Allahu është Falës i madh dhe Mëshirëplotë.” (Bekare, 180-182)
2741. Nga: Aishe bint Ebu Bekri
Amër ibn Zurara na ka thënë: Na ka rrëfyer Ismaili, e ky nga Ibn Avniu, e ky nga Ibrahimi se Esvedi tregon se dikush, në prani të Aishes (Allahu qoftë i kënaqur me të!), përmendi se Pejgamberi ﷺ i ka lënë Aliut testament. Ajo tha: “Kur ia paska lënë testamentin, ndërkohë Pejgamberi ﷺ vazhdimisht ka qenë i mbështetur në gjoksin tim, - ose ka thënë: në prehrin tim? - Ai kërkoi një enë dhe pothuajse ra nga prehri im, sakaq vërejta se ai kishte vdekur. E kur ia paska lënë testamentin atij (Aliut)?!”