Sahihu i Buhariut — Hadithi 2752
10. Nënkapitulli: Nëse i lë vakëf ose testament farefisit të vet, si dhe cilët konsiderohen farefis
Thabiti transmeton nga Enesi se Pejgamberi ﷺ i ka thënë Ebu Talhait: “Jepua të varfërve nga të afërmit e tu.” Kështu, ai ia dha Hasanit dhe Ubej ibn Kabit. Ensariu ka thënë: "Më ka treguar babai im, e ky nga Thumame, njëjtë sikur në hadithin Thabitit, përveçse këtu Enesi shton: "Ubej ibn Kabi ka qenë më afër me Ebu Talhain sesa unë. Hasani bashkohej me Ebu Talhain te stërgjyshi (Haram ibn Amri), kurse Ubeji bashkohej me të te gjyshi i gjashtë (Amër ibn Maliku). Pra, Amër ibn Maliku i bashkonte të tre, Hasanin, Ebu Talhain dhe Ubejin." Disa kanë thënë: "Nëse i lë testament dikujt të farefisit, atëherë afërsia llogaritet deri te gjyshërit që kanë qenë muslimanë."
2752. Nga: Enes ibn Malik Ensariu
Abdullah ibn Jusufi na ka thënë: Na ka rrëfyer Maliku, e ky nga Is'hak ibn Abdullah ibn Ebu Talhai se Enesi (Allahu qoftë i kënaqur me të!) transmeton se Pejgamberi ﷺ i ka thënë Ebu Talhait: “Unë propozoj t'ua japësh farefisit.” Atëherë Ebu Talhai i tha: “Ashtu do të bëj, o i Dërguari i Allahut.” Kështu, ua ndau farefisit dhe djemve të xhaxhait të vet.
Ibn Abasi ka thënë: “Kur ka zbritur ajeti: “Paralajmëroje farefisin tënd më të afërm”, (Shuara, 214) Pejgamberi ﷺ filloi të thërrasë: “O benu fihrë! O benu adijë!” - fise të ndryshme kurejshish.
Ebu Hurejra ka thënë: “Kur ka zbritur ajeti: “Paralajmëroje farefisin tënd më të afërm”, (Shuara, 214) Pejgamberi ﷺ filloi të thërrasë: “O kurejshë!”