Sahihu i Buhariut — Hadithi 3082

Abdullah ibn Ebu Esvedi na ka thënë: Na ka treguar Jezid ibn Zureji dhe Humejd ibn Esvedi, e ky nga Habib ibn Shehidi, e ky nga Ibn Ebu Mulejke se Ibn Zubejri i tha Ibn Xhaferit (Allahu qoftë i kënaqur me ta!): “A të kujtohet kur unë, ti dhe Ibn Abasi e patëm pritur të Dërguarin e Allahut ﷺ (gjatë kthimit të tij nga beteja)?” Ai tha: “Po.” Pastaj Ibn Zubejri i tha: “Neve na hipi në kafshë, ndërsa ty të la.”