Sahihu i Buhariut — Hadithi 3140
17. Nënkapitulli: Argumente se një e pesta e plaçkës i takon prijësit
Edhe (fakti se) ai u jep disa të afërmve, e disa të tjerëve jo. Pejgamberi ﷺ, benu mutalibëve dhe benu hashimëve, u ka dhënë hise nga një e pesta e plaçkës së Hajberit. Omer ibn Abdulazizi ka thënë: "Nuk u ka dhënë të gjithëve (kurejshëve) dhe nuk ka veçuar ndonjë të afërm kundrejt ndonjërit në nevojë, edhe nëse ka qenë më i largët, për shkak të nevojave të tyre dhe mundimeve që kanë përjetuar, nga populli dhe aleatët e tyre, duke qenë pranë tij."
3140. Nga: Xhubejr ibn Mutëimi
Abdullah ibn Jusufi na ka thënë: Na ka treguar Lejthiu, e ky nga Ukajli, e ky nga Ibn Shihabi, e ky nga Ibn Musejebi se Xhubejr ibn Mut'imi (Allahu qoftë i kënaqur me të!) tregon: “Unë dhe Othman ibn Afani shkuam te Pejgamberi ﷺ dhe i thamë: “O i Dërguari i Allahut, benu mutalibëve u ke dhënë, kurse neve jo, ndërkaq të dy palët kemi pozitën e njëjtë në raport me ty.” I Dërguari i Allahut ﷺ u tha: “Benu mutalibët dhe benu hashimët për mua janë të njëjtë.”
Lejthiu ka thënë: “Më ka treguar Junusi, dhe ka shtuar se Xhubejri ka thënë: “Pejgamberi ﷺ nuk i ka dhënë hise as familjes benu abdushems e as familjes benu neufel.”
Ibn Is'haku ka thënë: “Abdushemsi, Hashimi dhe Mutalibi kanë qenë vëllezër nga nëna. Nëna e tyre ka qenë Atike bint Murraja, kurse Neufeli ka qenë vëllai tyre nga babai.”