Sahihu i Buhariut — Hadithi 4321
55. Nënkapitulli: Ajeti: “Me të vërtetë, Allahu ju ka ndihmuar në shumë vende, si dhe në ditën e (luftës) së Hunejnit kur ju entuziazmoi numri i madh i juaj, por ai numër nuk ju solli dobi, asgjë, toka ju duk e ngushtë, edhe pse është e gjerë, prandaj u zmbrapsët duke vrapuar. Pastaj, Allahu ia dërgoi qetësinë e Tij Pejgamberit të vet dhe besimtarëve dhe e dërgoi ushtrinë, të cilën ju nuk e keni parë, e i dënoi ata që kanë mohuar. Ky është ndëshkimi i mohuesve. E, pas kësaj, Allahu e pranon pendimin për kë të dojë. Allahu është Falës dhe Mëshirues.”
4321. Nga: Ebu Katade Sulemiu
Abdullah ibn Jusufi na ka thënë: Na ka rrëfyer Maliku, e ky nga Jahja ibn Seidi, e ky nga Omer ibn Kethir ibn Eflahu, e ky nga Ebu Muhamedi, i çrobëruari i Ebu Katades, se Ebu Katadja (Allahu qoftë i kënaqur me të!) rrëfen: “Vitin e Betejës së Hunejnit u nisëm me Pejgamberin ﷺ dhe, kur u ballafaquam me armikun, muslimanët pësuan një thyerje. Pashë një idhujtar se i kishte hipur sipër një muslimani, andaj e godita nga mbrapa me shpatë në qafë, saqë ia preva parzmoren. Ai u kthye nga unë, më mbërtheu aq fort, saqë e nuhata erën e vdekjes. Por, e kaploi vdekja dhe më lëshoi. Unë iu bashkëngjita Omerit dhe i thashë: “Çfarë po ndodh me njerëzit (ushtarët)?!” Ai më tha: “Caktimi i Allahut.” Pasi ushtria u kthye, Pejgamberi ﷺ u ul dhe tha: “Atij që ka vrarë ndonjë armik dhe ka dëshmi për këtë, i takon preja e të vrarit (mjetet e luftës).” Unë thashë: “Kush dëshmon për mua?” Pastaj u ula.
Pejgamberi ﷺ tha sërish të njëjtën gjë.
Unë prapë u ngrita dhe thashë: “Kush dëshmon për mua?” Pastaj u ula.
Pejgamberi ﷺ tha sërish të njëjtën gjë.
Unë u ngrita, por Pejgamberi ﷺ ma priti duke thënë: “Çfarë ke, o Ebu Katade?” - andaj ia tregova ndodhinë. Një burrë tha: “Ashtu është, o i Dërguari i Allahut, ndërsa prenë e armikut të tij e kam unë, por kompensoja atij me diçka, e kjo të më mbetet mua.” Ebu Bekër Sidiku tha: “Jo, për Allahun! Atëherë, po i bie që Pejgamberi ﷺ të ta japë ty plaçkën e njërit prej luanëve të Allahut, i cili lufton për Allahun dhe të Dërguarin e Tij ﷺ.” Pejgamberi ﷺ tha: “Të vërtetën e ka thënë, jepja atij (Ebu Katades)!” - dhe ma dha prenë. Parzmoren e shita dhe bleva një kopsht hurmash në fisin benu selime. Kjo ishte pasuria e parë që e fitova si musliman.”