Sahihu i Buhariut — Hadithi 4495
23. Nënkapitulli: Ajeti: “Kodrinat Safa dhe Merva (në Mekë) janë pjesë e Simboleve të Allahut, prandaj ai që viziton Qaben për haxh ose për umre, s’ka kurrfarë gjynahu nëse sillet mes tyre. Kush bën vepra të mira vullnetare, ta dijë se Allahu është njëmend Falënderues dhe i Gjithëdijshëm.”
﴾شَعَائِرِ ﴿ (Sheair): shenja. Ibn Abasi ka thënë: "Safvan është lloj guri. Thuhet se është fjala për gurët e lëmuar, sipër të cilëve nuk mbin asgjë. Në njëjës i referohet si Safvaneh në kuptimin e Safasë, kurse Safa si emër përmbledhës (kodra Safa)."
4495. Nga: Aishe bint Ebu Bekri
Abdullah ibn Jusufi na ka thënë: Na ka rrëfyer Maliku, e ky nga Hisham ibn Urve se Urve tregon: “Sa isha i ri, e pyeta Aishen (Allahu qoftë i kënaqur me të!), gruan e Pejgamberit ﷺ: “Fjala e Allahut Fuqiplotë: “Kodrinat Safa dhe Merva (në Mekë) janë pjesë e Simboleve të Allahut, prandaj ai që viziton Qabenë për haxh ose për umre, s'ka kurrfarë gjynahu nëse sillet mes tyre...”, (Bekare, 158) mendoj se e ka kuptimin se, nëse ndokush nuk kryen ecjen mes tyre, nuk ka kurrfarë mëkati.” Ajo më tha: “Jo, nuk është ashtu. Sikur të ishte siç thua ti, atëherë ajeti do të duhej të ishte: “... s'ka kurrfarë gjynahu nëse nuk sillet mes tyre...” Ky ajet ka zbritur për ensarët, të cilët (para Islamit) pelegrinazhin e kryenin për idhullin Menat, i cili ndodhej pranë Kudejdit. Kështu, ecjen mes Safasë dhe Mervës e konsideronin gjynah. Por, kur erdhi Islami, e pyetën të Dërguarin e Allahut ﷺ rreth kësaj, e në atë rast Allahu e zbriti ajetin: “Kodrinat Safa dhe Merva (në Mekë) janë pjesë e Simboleve të Allahut, prandaj ai që viziton Qabenë për haxh ose për umre, s'ka kurrfarë gjynahu nëse sillet mes tyre...” (Bekare, 158)