Sahihu i Buhariut — Hadithi 4500
25. Nënkapitulli: Ajeti: “O besimtarë! Është caktuar për ju kisasi për vrasje: "I liri për të lirin, skllavi për skllavin dhe femra për femrën. Ai (vrasës) që falet ('ufije') nga farefisi i të vrarit, duhet të sillet njerëzishëm dhe le të zbatojë dëmshpërblimin me të mirë. Kjo (falje) është një lehtësi dhe mëshirë nga ana e Zotit. E kushdo që pas kësaj (falje), e kapërcen kufirin, do të marrë një dënim të dhembshëm.”
﴾عُفِيَ﴿ (Ufije): është lënë.
4500. Nga: Enes ibn Malik Ensariu
Abdullah ibn Muniri më ka thënë se e ka dëgjuar Abdullah ibn Bekër Sehmiun, e këtij i ka treguar Humejdi se Enesi (Allahu qoftë i kënaqur me të!) tregon se Rrubeja, halla e tij, ia theu dhëmbin një vajze. Familjes së vajzës i kërkuan t'ua falin, por ata refuzuan. U ofruan edhe shpagim, por ata refuzuan. Shkuan edhe tek i Dërguari i Allahut ﷺ, por ata refuzuan çdo gjë tjetër, duke këmbëngulur në hakmarrje. Prandaj, i Dërguari i Allahut ﷺ urdhëroi të merret hak. Enes ibn Nadri i tha: “O i Dërguari i Allahut! Vallë, Rrubejës t'i thyhet dhëmbi?! Kurrë! Betohem në Atë, që të ka dërguar me të vërtetën, se asaj nuk do t'i thyhet dhëmbi!” Pejgamberi ﷺ i tha: “O Enes! Libri i Allahut urdhëron të merret hak!” Por, familja e vajzës u pajtuan që t'ia falin. Atëherë, i Dërguari i Allahut ﷺ tha: “Ka robër të Allahut, të cilëve, kur betohen në Allahun, Ai ua realizon betimin.”