Sahihu i Buhariut — Hadithi 4784
245. Nënkapitulli: Ajeti: “... E disa prej tyre e realizuan premtimin (duke dhënë jetën) dhe ka prej tyre që janë duke pritur (ta zbatojnë) dhe nuk kanë ndryshuar asgjë.”
﴾نَحْبَهُ﴿ (Nahbehu): Premtimin (23). ﴾أَقْطَارِهَا﴿ (Ektariha): Skajet e saj (14). ﴾لآتَوْهَا﴿ (Le ateuha): Do ta jepnin (14).
4784. Nga: Zejd ibn Thabiti
Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka rrëfyer Harixhe ibn Zejd ibn Thabiti se Zejd ibn Thabiti (Allahu qoftë i kënaqur me të!) ka thënë: “Kur i shkruam të gjitha fletushkat kuranore në mus'hafe, më mungonte një ajet i sures Ahzab, të cilin shpesh e kisha dëgjuar të Dërguarin e Allahut ﷺ tek e lexonte. Këtë ajet nuk e pata gjetur (të shkruar) tek askush, përveç te Huzejme Ensariu, për dëshminë e të cilit i Dërguari i Allahut ﷺ ka thënë se vlen sa dëshmia e dy burrave. Fjala është për ajetin: “Midis besimtarëve ka të atillë, që e kanë mbajtur besëlidhjen me Allahun...” (Ahzab, 23)