Sahihu i Buhariut — Hadithi 5368
13. Nënkapitulli: Shpenzimi i dikujt që është në gjendje të vështirë për familjen e tij
5368. Nga: Ebu Hurejra
Ahmed ibn Junusi na ka thënë: Na ka treguar Ibrahim ibn Sadi, e këtij i ka treguar Ibn Shihabi nga Humejd ibn Abdurrahmani se Ebu Hurejra (Allahu qoftë i kënaqur me të!) ka thënë: “Teksa rrinim ulur te Pejgamberi ﷺ, erdhi një njeri dhe i tha: “O i Dërguari i Allahut, jam shkatërruar!”
- “Përse?!” - e pyeti Pejgamberi ﷺ.
- Kam bërë marrëdhënie intime me gruan në Ramazan (agjërueshëm), - iu përgjigj ai.
- “Liro një rob.”
- Nuk kam, - tha ai.
- “E po, agjëro dy muaj rresht.”
- Nuk kam mundësi, - tha ai.
- “Atëherë ushqeji gjashtëdhjetë të varfër?”
- Nuk kam me çka, - tha ai.
Ndërkohë, dikush i solli Pejgamberit ﷺ një shportë me hurma, e në atë rast tha: “Ku është pyetësi?”
- Ja ku jam, - tha ai.
- “Merre këtë dhe jepe lëmoshë.”
- T'i jap ndonjë më të varfri se unë, o i Dërguari i Allahut...?! Betohem në Atë që të ka dërguar ty se mes dy pllajave (të Medinës) nuk ka shtëpi më të varfër se familja ime, - tha ai.
Pejgamberi ﷺ qeshi, saqë iu dukën dhëmbët, pastaj tha: “Atëherë, ushqeje familjen tënde me të.”