Sahihu i Buhariut — Hadithi 6086
68. Nënkapitulli: Qeshja dhe buzëqeshja
Fatimja ka thënë: "Pejgamberi ﷺ më tregoi diçka në fshehtësi dhe unë qesha." Ibn Abasi ka thënë: "Vërtet Allahu dikë e bën të qeshë e dikë të qajë."
6086. Nga: Abdullah ibn Amër ibn Asi
Kutejbe ibn Seidi na ka thënë: Na ka treguar Sufjani, e ky nga Amri, e ky nga Ebu Abasi se Abdullah ibn Amri (Allahu qoftë i kënaqur me ta!) tregon: “Kur i Dërguari i Allahut ﷺ ndodhej në Taif, tha: “Nesër do të largohemi, në dashtë Allahu!” Disa shokë të të Dërguarit të Allahut ﷺ thanë: “Nuk lëvizim pa e çliruar!” Atëherë Pejgamberi ﷺ u tha: “Sulmoni në mëngjes, pra!”
Kështu, ata sulmuan në mëngjes, por armiku reagoi ashpër, andaj u rrit numri i të plagosurve. Në atë rast i Dërguari i Allahut ﷺ tha: “Do të largohemi nesër, në dashtë Allahu!” Ata heshtën, gjë që e bëri të Dërguarin e Allahut ﷺ të qeshë.”
Humejdiu ka thënë: “Sufjani na ka njoftuar për tërë këtë.”