Sahihu i Buhariut — Hadithi 6333
19. Nënkapitulli: Ajeti: “... Dhe lutu për ta...”, si dhe veçimi i vëllait me lutje pa u lutur për vete
Ebu Musai tregon se Pejgamberi ﷺ është lutur: “O Allah, fale Ubejd ibn Amirin! O Allah, falja mëkatin Abdullah ibn Kajsit!”
6333. Nga: Xherir ibn Abdullahu
Ali ibn Abdullahu na ka thënë: Na ka treguar Sufjani, e ky nga Ismaili, e ky nga Kajsi se Xheriri (Allahu qoftë i kënaqur me të!) tregon: “I Dërguari i Allahut ﷺ më tha: “A nuk ma heq qafe Dhul Halasën?”, - e cila ishte një grumbull idhujsh që njerëzit e adhuronin dhe e quanin Qabeja Jemenase. Unë i thashë: “O i Dërguari i Allahut, unë nuk mund të qëndroj mbi kalë.” Atëherë Pejgamberi ﷺ më goditi në gjoks dhe tha: “O Allah, forcoje, udhëzoje dhe bëje udhëzues!”
Kështu, marshova me pesëdhjetë kalorës të fisit ahmes nga populli im.
Në një transmetim qëndron: “U nisa me një grup nga populli im, shkova dhe e dogja atë. Pastaj u ktheva te Pejgamberi ﷺ dhe i thashë: “O i Dërguari i Allahut, betohem në Allahun se, nuk u ktheva pa e bërë atë si një deve të zgjebosur. Atëherë Pejgamberi ﷺ u lut për fisin ahmes dhe për kuajt e tyre.”