Sahihu i Buhariut — Hadithi 6470
20. Nënkapitulli: Durimi kundrejt asaj që e ka ndaluar Allahu
Allahu i Madhëruar ka thënë: “… Ndërsa durimtarëve u jepet shpërblimi i tyre pa masë!” (Zumer, 10) Omeri ka thënë: "Jeta jonë më e mirë ka qenë ajo që e jetonim duke bërë durim."
6470. Nga: Ebu Seid Hudriu
Ebu Jemani na ka thënë: Na ka rrëfyer Shuajbi, e ky nga Zuhriu, e këtij i ka rrëfyer Ata ibn Jezidi se Ebu Seid Hudriu (Allahu qoftë i kënaqur me të!) tregon: “Disa ensarë i lypën të Dërguarit të Allahut ﷺ, andaj nuk la asnjërin prej tyre pa i dhënë, derisa u shterua gjithë ajo që posedonte. Pasi e harxhoi të tërën duke e shpërndarë me duart e veta, Pejgamberi ﷺ u tha: “Të mirat që kam nuk i kursej prej jush. Mirëpo (ta dini se), kush kërkon ndershmëri, Allahu e bën të ndershëm; kush përpiqet të bëjë durim, Allahu e bën të durueshëm dhe kush mjaftohet me pasurinë që ka, Allahu e bën të pasur. Askujt nuk i është dhënë diçka më e mirë dhe më e çmuar sesa durimi.”