Sahihu i Buhariut — Hadithi 6633
3. Nënkapitulli: Si betohej Pejgamberi ﷺ?
Sadi tregon se Pejgamberi ﷺ ka thënë: “Betohem në Atë, në Dorën e të Cilit është shpirti im!” Ebu Katade tregon: "Ebu Bekri, në prani të Pejgamberit ﷺ, tha: "Jo, betohem në Allahun! Shprehjet që përdoren për betim janë: vallahi, bilahi dhe tallahi."
6633. Nga: Ebu Hurejra - Zejd ibn Halid Xhuheniu
6633. 6634. Ismaili na ka thënë: Më ka treguar Maliku, e ky nga Ibn Shihabi, e ky nga Ubejdullah ibn Abdullah ibn Utbe ibn Mesudi se Ebu Hurejra dhe Zejd ibn Halidi (Allahu qoftë i kënaqur me ta!) rrëfejnë: “Dy persona kërkuan gjykim tek i Dërguari i Allahut ﷺ, njëri prej të cilëve tha: “Mes nesh gjyko sipas Librit të Allahut!” Ndërkaq, tjetri, që kishte dituri më shumë se i pari, tha: “Po, o i Dërguari i Allahut, mes nesh gjyko sipas Librit të Allahut dhe më lejo të flas.”
- “Fol”, - i tha Pejgamberi ﷺ.
- Djali im ka qenë argat te ky dhe ka bërë zina me gruan e tij. Më thanë se biri im duhet të dënohet me gurëzim. Andaj, e shpagova djalin tim me dyqind dele dhe një robëreshë. Pastaj i pyeta dijetarët, të cilët më thanë se biri im duhet të ndëshkohet me kamxhik dhe të dëbohet për një vit, e ajo që duhet të gurëzohet është gruaja e këtij, - tha beduini.
I Dërguari i Allahut ﷺ i tha: “Betohem në Atë, në Dorën e të Cilit është shpirti im, se mes jush do të gjykoj sipas Librit të Allahut. Sa u përket deleve dhe robëreshës sate, duhet të të kthehen.” Kështu, të birin e beduinit e dënoi me njëqind goditje kamxhiku dhe e dëboi për një vit dhe e urdhëroi Unejs Eslemiun të shkojë te gruaja e tjetrit që, nëse pranon (se ka bërë zina), ta gurëzojë. Ajo e pranoi veprën, prandaj e gurëzoi.”