Sahihu i Buhariut — Hadithi 6716
7. Nënkapitulli: A lejohet të bëhet shpagimi me lirimin prej robërisë: të robit, i cili do të lirohet pas vdekjes së zotërisë së tij; të robëreshës që është nëna e fëmijës së zotërisë; të robit i cili ka bërë kontratë ta lirojë veten, por ende nuk e ka mbaruar pagesën, si dhe lirimi nga robëria i kopilit?
Tavusi ka thënë: "Lejohet të bëhet shpagimi me lirimin e robit, liria e të cilit është e kushtëzuar me vdekjen e zotërisë së tij, dhe robëreshës që është nënë e fëmijës së zotërisë."
6716. Nga: Xhabir ibn Abdullah Ensariu
Ebu Numani na ka thënë: Na ka rrëfyer Hamad ibn Zejdi, e ky nga Amri se Xhabiri (Allahu qoftë i kënaqur me të!) tregon se një ensar liroi një rob, duke i kushtëzuar lirinë me vdekjen e pronarit. Ai nuk kishte pasuri tjetër pos atij robi, gjë për të cilën, kur Pejgamberi ﷺ u informua, tha: “Kush po e blen këtë rob prej meje?” Kështu, Nuajm ibn Nuhami e bleu për tetëqind dërhemë.
Xhabiri thoshte: “Ai ka qenë rob koptas. Vdiq qysh në vitin e parë.”