Sahihu i Buhariut — Hadithi 6758
22. Nënkapitulli: Nëse e pranon Islamin në duart e tij
Haseni mbronte mendimin se atij nuk i takon vilajeti (merita e trashëgimisë). Kjo, se Pejgamberi ﷺ ka thënë: “Merita e çrobërimit (trashëgimisë) i takon atij që e ka liruar.” Nga Temim Dariu përmendet se Pejgamberi ﷺ ka thënë: “Ai (që ka qenë shkak i pranimit të Islamit) është njeriu më meritor për të, sa është gjallë dhe pas vdekjes.” Por, ka mospajtime rreth saktësisë së këtij hadithi.
6758. Nga: Aishe bint Ebu Bekri
Muhamedi na ka thënë: Na ka rrëfyer Xheriri, e ky nga Mensuri, e ky nga Ibrahimi, e ky nga Esvedi se Aishja (Allahu qoftë i kënaqur me të!) tregon: “E bleva Berirën, por pronarët e vet ma kushtëzuan meritën e çrobërimit (trashëgimisë) të saj. Kur ia përmenda këtë Pejgamberit ﷺ, më tha: “Liroje, sepse merita e çrobërimit i takon atij që i jep paratë.” Rrjedhimisht, e lirova.
I Dërguari i Allahut ﷺ e thirri dhe i tha të zgjidhte nëse donte të qëndronte edhe më tej me burrin e saj, apo jo. Ajo iu përgjigj: “Edhe sikur të ma jepte këtë e atë, nuk do të qëndroja me të.” Andaj, zgjodhi të ndahej prej tij.”