Sahihu i Buhariut — Hadithi 6977
14. Nënkapitulli: Hilet në dhuratë dhe në parablerje
Buhariu shton: "Megjithatë, disa thonë se nëse një person i dhuron dikujt një mijë ose më shumë dërhemë, të cilët qëndrojnë tek i pari me vite të tëra, - porse dhuruesi në fjalë është duke bërë hile, - e më pas i rimerr ato, asnjëri prej tyre nuk e jep zekatin e kësaj pasurie." (Buhariu thotë:) "Ky person e ka kundërshtuar praktikën e të Dërguarit ﷺ rreth dhurimit, si dhe nuk ka dhënë zekat."
6977. Nga: Ebu Rafiu
Ali ibn Abdullahu na ka thënë: Na ka treguar Sufjani, e ky nga Ibrahim ibn Mejsera se Amër ibn Sheridi rrëfen: “Misver ibn Mahremi erdhi e ma vendosi dorën mbi sup dhe së bashku shkuam te Sadi. Ebu Rafiu (Allahu qoftë i kënaqur me ta!) i tha Misverit: “A nuk po i thua këtij që ta blejë shtëpinë time?”
- Nuk i jap më shumë se katërqind (mithkalë), madje, ose në shuma të ndara, ose me këste, - tha Sadi.
- Mua m'i kanë ofruar pesëqind në dorë, porse nuk e kam dhënë. Sikur të mos e kisha dëgjuar të Dërguarin e Allahut ﷺ duke thënë: “Fqinji është më meritor për pjesën e fqinjit”, nuk do të ta shisja fare, - ia ktheu Ebu Rafiu.
Ali ibn Abdullahu tregon: “I thashë Sufjanit: “Mameri nuk ka thënë kështu.” Buhariu shton: “Disa thonë se, nëse dikush dëshiron ta shesë pjesën në të cilën ortaku ka të drejtë parablerjeje, i lejohet të bëjë hile për ta zhvleftësuar të drejtën e ortakut për parablerje. Kështu, shitësi në fjalë shtëpinë ia fal blerësit, pra, i vendos kufijtë rreth saj dhe ia dorëzon. Më pas, blerësi ia kompenson atij me një mijë dërhemë, rrjedhimisht, ortaku nuk ka të drejtë parablerjeje.”