Sahihu i Buhariut — Hadithi 7316
13. Nënkapitulli: Transmetimet që flasin rreth interpretimit juridik të gjykatësve duke u bazuar në atë që ka zbritur Allahu i Lartësuar
Allahu ka thënë: “Ata që nuk gjykojnë sipas asaj që ka zbritur Allahu janë zullumqarët e vërtetë.” (Maide, 45) Pejgamberi ﷺ e ka lavdëruar personin që ka urtësi, me të cilën gjykon dhe ua mëson të tjerëve, nuk mundohet të gjykojë nga mendja e vet (pa dije), por i konsulton halifët dhe i pyet dijetarët.
7316. Nga: Abdullah ibn Mesudi
Shihab ibn Abadi na ka thënë: Na ka treguar Ibrahim ibn Humejdi, e ky nga Ismaili, e ky nga Kajsi se Abdullahu (Allahu qoftë i kënaqur me të!) thotë: “I Dërguari i Allahut ﷺ ka thënë: “Nuk lejohet zilia, përveç në dy raste:
1. Ndaj personit që Allahu i ka dhuruar pasuri dhe ai e shpenzon me të drejtë;
2. Dhe ndaj personit që Allahu i ka dhënë urtësi, me të cilën ai gjykon dhe ua mëson të tjerëve.”