Hadithet e ngjashme me hadithin 2418

Ahmedi na ka thënë: Na ka treguar Ibn Vehbiu, e këtij i ka rrëfyer Junus ibn Jezidi, e ky nga Ibn Shihabi, e këtij i ka treguar Abdullah ibn Kab ibn Maliku se Kab ibn Maliku (Allahu qoftë i kënaqur me të!) tregon se, një ditë, në kohën e të Dërguarit të Allahut ﷺ, duke qenë në xhami, i kërkoi Ibn Ebu Hadredit t'i kthente një borxh. (Mes tyre shpërtheu një zënkë, ndaj) u ngritën zërat, saqë i Dërguari i Allahut ﷺ i dëgjoi në shtëpinë e vet. Doli, ngriti perden e derës dhe thirri:

- “O Kab ibn Malik! O Kab!”

- Të përgjigjem, o i Dërguari i Allahut! - tha Kabi, e Pejgamberi ﷺ i bëri me shenjë, t'ia falte gjysmën e borxhit.

- Atëherë, po ia fal, o i Dërguari i Allahut!

- “Ngrihu dhe ktheja borxhin (e mbetur)!” - i tha tjetrit.

Abdullah ibn Muhamedi na ka thënë: Na ka treguar Othman ibn Omeri, e këtij i ka rrëfyer Junusi, e ky nga Zuhriu, e ky nga Abdullah ibn Kab ibn Maliku se Kabi (Allahu qoftë i kënaqur me të!) tregon se, duke qenë në xhami, i kërkoi Ibn Ebu Hadredit t'i kthente një borxh. (Mes tyre shpërtheu një zënkë, ndaj) u ngritën zërat, saqë i Dërguari i Allahut ﷺ i dëgjoi në shtëpinë e vet. Doli, e ngriti perden e derës dhe thirri:

- “O Kab!”

- Të përgjigjem, o i Dërguari i Allahut! - tha Kabi.

- “Falja një pjesë të borxhit!” - dhe bëri me shenjë: gjysmën.

- Atëherë, po ia fal, o i Dërguari i Allahut!

- “Ngrihu dhe ktheja borxhin (e mbetur)!” - i tha tjetrit.