Umdetul Ahkam — Hadithi 275

Xhabir ibn Abdullahu (Allahu qoftë i kënaqur me ta!) tregon: “Teksa po udhëtoja hipur mbi një deve të lodhur, të cilën desha ta lëshoja, Pejgamberi ﷺ kaloi pranë dhe bëri dua për mua, pastaj i mëshoi devesë. Pas kësaj, deveja filloi të ecë shpejt si kurrë më parë. Ndërkohë Pejgamberi ﷺ më tha: “Ma shit atë për një okë.”

- Jo, - ia ktheva.

- “Ma shit atë!” - më tha sërish Pejgamberi ﷺ.

Atëherë ia shita për një okë (ar) dhe ia kushtëzova shfrytëzimin e saj derisa të arrija në shtëpi. Kur arritëm në shtëpi, shkova dhe ia çova devenë, ndërsa ai m'i dha paratë. Pasi u largova, ai dërgoi dikë të më kërkonte dhe më tha: “Vallë, mendove se u shtyva në çmim për të ta marrë devenë?! Merre devenë dhe dërhemët. Ato janë të tuat.”