Sahihu i Buhariut — Hadithi 1141

Allahu ﷻ thotë: “O ti i mbështjellë (o Muhamed)! Falu gjatë natës, përveç një pjese të vogël të saj, (Falu) gjysmën e saj ose diç më pak se gjysmën, ose shto edhe pak dhe Kuranin lexoje me vëmendje! Ne do të të shpallim ty fjalë të rëndë. E s’ka dyshim se adhurimi i natës është fuqizues dhe fjalë më e qëndrueshme. Meqë ti, me të vërtetë, ditën je shumë i angazhuar.”. (Muzemil, 1-7) Allahu ﷻ thotë: “... Ai e di se ju nuk mund ta llogarisni atë saktësisht, prandaj ju fal juve. Kështu që lexoni Kuran aq sa mundeni! Ai e di se disa prej jush do të jenë të sëmurë, disa do të udhëtojnë nëpër botë, duke kërkuar mirësitë e Tij (për jetesë) dhe disa të tjerë do të jenë duke luftuar në rrugën e Tij, prandaj lexoni sa të keni mundësi nga Kurani! Faleni namazin, jepeni zekatin dhe jepini Allahut një hua të mirë (që Ai t’jua kthejë shumëfish). Çfarëdo mirësie që bëni për shpirtin tuaj, me siguri që do ta gjeni tek Allahu. Ajo do të jetë më e mirë dhe më e shpërblyer…” (Muzemil, 20)

Ebu Abdullahu (Buhariu) ka thënë: "Ibn Abasi ka thënë: “Fjala “نَشَأَ” (neshe'e) e ka kuptimin: “u ngrit (për t'u falur)” në gjuhën abisinase. (d.m.th : shprehja: إِنَّ نَاشِئَةَ اللَّيْلِ (ina nashietel lejli) sipas kësaj e ka kuptimin: "Namazi i natës, adhurimi i natës) Ndërsa, fjala “وِطَاءً (vetae) (sipas një leximi tjetër të ajetit)” e ka kuptimin: është në përputhje (përshtatshmëri, pajtueshmëri) dhe harmoni me leximin e Kuranin. (Pra kuptimi i ajetit sipas këtij leximi është): Namazi i natës më tepër i bashkon dhe e lidh zemrën, gjuhën dhe syrin (dhe mundëson më tepër përqendrim në leximin e Kuranit). Fjala ﴾لِيُوَاطِئُوا﴿ (lijuvatiu) (Teube 37) e ka kuptimin: për të përputhur."