Sahihu i Buhariut — Hadithi 1253
8. Nënkapitulli: Larja e të vdekurit dhe dhënia abdes me ujë e sidër
Ibn Omeri parfumoi një djalë të vdekur të Seid ibn Zejdit, e barti atë dhe ia fali xhenazen pa e përsëritur abdesin. Ibn Abasi ka thënë: "Muslimani nuk ndyhet, as i gjallë e as i vdekur." Sad ibn Ebu Vekasi ka thënë: "Sikur të ishte i ndytë, nuk do ta kisha prekur." Pejgamberi ﷺ ka thënë: "Besimtari nuk ndyhet."
1253. Nga: Umu Atija Ensarja
Ismail ibn Abdullahu na ka thënë: Më ka treguar Maliku, e ky nga Ejub Sehtijaniu, e ky nga Muhamed ibn Sirini se Umu Atije Ensarja (Allahu qoftë i kënaqur me të!) tregon: “Kur të Dërguarit të Allahut ﷺ i vdiq e bija (Zejnebja), hyri te ne dhe tha: “Pastrojeni me ujë e sidër, tri, pesë ose më shumë herë, sa ta shihni të nevojshme. Ndërkaq, herën e fundit pastrojeni me kamfur, ose diçka prej tij. Kur ta mbaroni, më tregoni.” Pasi e kryem, i treguam, e në atë rast na e dha rrobën e tij të poshtme dhe tha: “Fillimisht mbështilleni me këtë.”