Sahihu i Buhariut — Hadithi 1283
31. Nënkapitulli: Vizitimi i varrezave
1283. Nga: Enes ibn Malik Ensariu
Ademi na ka thënë: Na ka treguar Shuëbe, e këtij i ka treguar Thabiti se Enes ibn Maliku (Allahu qoftë i kënaqur me të!) tregon se Pejgamberi ﷺ kaloi pranë një gruaje që po qante te një varr, e në atë rast ai i tha:
- “Ki frikë Allahun dhe duro!”
- Largohu prej meje, se ty nuk të ka goditur fatkeqësi si mua, - ia ktheu ajo pa e njohur.
Kur dikush i tregoi se ai ishte Pejgamberi ﷺ, ajo i vajti në shtëpi, por te porta e tij nuk gjeti asnjë rojë (kështu që hyri) dhe i tha: “Nuk të kam njohur.”
Pejgamberi ﷺ i tha: “Durimi është në goditjen e parë (të fatkeqësisë).”