Sahihu i Buhariut — Hadithi 1696
106. Nënkapitulli: Damkosja e kurbanit dhe vendosja e qafores në qafën e kurbanit në Dhul Hulejfe, para hyrjes në ihram
Nafiu tregon: "Kur Ibn Omeri e merrte kurbanin prej Medinës, i vendoste qafore dhe e damkoste në Dhul Hulejfe: e godiste anën e djathtë të gungës (së devesë) me një brisk (i cili ia gjakoste pak lëkurën) teksa kafsha qëndronte ulur drejt kiblës."
1696. Nga: Aishe bint Ebu Bekri
Ebu Nuajmi na ka thënë: Na ka treguar Eflahu, e ky nga Kasimi se Aishja (Allahu qoftë i kënaqur me të!) ka thënë: “Qaforet e kurbanit të Pejgamberit ﷺ i kam thurur me duart e mia, pastaj ai ia ka vendosur kurbanit, e ka damkosur dhe e ka dhuruar (për ta therur në Mekë). Mirëpo, asgjë prej të lejuarave nuk iu bë e ndaluar (me këtë veprim).”