Sahihu i Buhariut — Hadithi 249

Muhamed ibn Jusufi na ka thënë: Na ka treguar Sufjani, e ky nga Ameshi, e ky nga Salim ibn Ebu Xhadi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!), gruaja e Pejgamberit ﷺ, ka thënë: “I Dërguari i Allahut ﷺ merrte abdes siç merrte për namaz, përveçse nuk i lau këmbët, e pastroi organin gjenital dhe pjesën tjetër ku ishte përlyer, pastaj e përshkoi tërë trupin me ujë e, në fund, u zhvendos nga vendi ku ndodhej dhe i lau këmbët. Kështu pastrohej nga xhunubllëku.”