5. Gusli

Abdullah ibn Jusufi na ka thënë: Na ka rrëfyer Maliku nga Hishami, e ky nga babai i tij se Aishja (Allahu qoftë i kënaqur me të!), gruaja e Pejgamberit ﷺ, tregon se, kur Pejgamberi ﷺ pastrohej nga xhunubllëku, së pari fillonte nga duart, pastaj merrte abdes sikurse për namaz, pastaj gishtërinjtë i fuste në ujë dhe me to i shpupurishte rrënjët e flokëve, i hidhte ujë kokës me grushte tri herë dhe, në fund, e përshkoi tërë trupin me ujë.

Muhamed ibn Jusufi na ka thënë: Na ka treguar Sufjani, e ky nga Ameshi, e ky nga Salim ibn Ebu Xhadi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!), gruaja e Pejgamberit ﷺ, ka thënë: “I Dërguari i Allahut ﷺ merrte abdes siç merrte për namaz, përveçse nuk i lau këmbët, e pastroi organin gjenital dhe pjesën tjetër ku ishte përlyer, pastaj e përshkoi tërë trupin me ujë e, në fund, u zhvendos nga vendi ku ndodhej dhe i lau këmbët. Kështu pastrohej nga xhunubllëku.”

Adem ibn Ebu Ijasi na ka thënë: Na ka treguar Ibn Ebu Dhiëbi, e ky nga Zuhriu, e ky nga Urve se Aishja (Allahu qoftë i kënaqur me të!) tregon: “Unë dhe Pejgamberi ﷺ pastroheshim nga një enë e përbashkët, në sasi të një fereku.”

Abdullah ibn Muhamedi na ka thënë: Më ka treguar Abdusamedi, e këtij i ka treguar Shuëbe, e këtij i ka treguar Ebu Bekër ibn Hafsi se Ebu Seleme (Allahu qoftë i kënaqur me të!) ka thënë: “Unë dhe vëllai i Aishes hymë tek Aishja, e në atë rast ai e pyeti rreth guslit të Pejgamberit ﷺ. Ajo kërkoi një enë përafërsisht sa një saë. U pastrua me të dhe e derdhi mbi kokë. Në mes nesh dhe saj ishte një perde.”

Ebu Abdullahu (Buhariu) ka thënë: “Jezid ibn Haruni, Behzi dhe Xhudiu transmetojnë nga Shuëbe: “Sa madhësia e një sait.”

Abdullah ibn Muhamedi na ka thënë: Na ka treguar Jahja ibn Ademi, e këtij i ka treguar Zuhejri, e ky nga babai i tij Is'haku se Ebu Xhaferi dhe babai i tij gjendeshin te një ndejë te Xhabir ibn Abdullahu (Allahu qoftë i kënaqur me ta!), ku gjendeshin edhe disa persona të tjerë, të cilët e pyetën rreth guslit. Ai u tha: “Të mjafton një saë. Njëri prej tyre i tha: “Mua nuk më mjafton.” Atëherë Xhabiri ia ktheu: “I mjaftonte atij që ka pasur flokë më shumë e që ka qenë më i mirë se ti.” Pastaj na priu në namaz, i veshur vetëm me një rrobë.”

Ebu Nuajmi na ka thënë: Na ka treguar Ibn Ujejne, e ky nga Amri, e ky nga Xhabir ibn Zejdi se Ibn Abasi (Allahu qoftë i kënaqur me të!) tregon se Pejgamberi ﷺ dhe Mejmunia laheshin nga një enë e përbashkët.

Ebu Abdullahu (Buhariu): “Ibn Ujejne, së fundmi, thoshte: “Transmeton Ibn Abasi nga Mejmunia, por e sakta është ajo që e transmeton Ebu Nuajmi.”

Ebu Nuajmi na ka thënë: Na ka treguar Zuhejri, e ky nga Ebu Is'haku, e këtij i ka treguar Sulejman ibn Suredi se Xhubejr ibn Mutëimi (Allahu qoftë i kënaqur me të!) thotë: “I Dërguari i Allahut ﷺ ka thënë: “Sa më përket mua, i hedh ujë kokës tri herë”, dhe demonstroi me të dy duart.”

Muhamed ibn Beshari më ka thënë: Na ka treguar Gunderi, e këtij i ka treguar Shuëbe, e ky nga Mihvel ibn Rashidi, e ky nga Muhamed ibn Aliu se Xhabir ibn Abdullahu (Allahu qoftë i kënaqur me ta!) ka thënë: “Pejgamberi ﷺ hidhte ujë mbi kokë tri herë.”

Ebu Nuajmi na ka thënë: Na ka treguar Mamer ibn Jahja ibn Samiu se Ebu Xhaferi tregon: “Xhabiri (Allahu qoftë i kënaqur me të!) më ka thënë: “Më erdhi kushëriri yt, - kishte për qëllim Hasen ibn Muhamed ibn Hanefiun, - dhe tha: “Si të pastrohemi nga xhunubllëku?” I thashë: “Pejgamberi ﷺ i hidhte ujë kokës me grushte tri herë, pastaj e përshkonte tërë trupin me ujë.” Haseni më tha: “Unë kam flokë të shpeshtë.” I thashë: “Pejgamberi ﷺ ka pasur flokë më shumë se ti.”

Musa (ibn Ismaili) na ka thënë: Na ka treguar Abdulvahidi, e ky nga Ameshi, e ky nga Salim ibn Ebu Xhadi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!) tregon: “Pejgamberit ﷺ i vendosa ujë për t'u larë. Ai e lau dorën dy-tri herë, pastaj i hodhi ujë së majtës e i lau organet gjenitale dhe e përshkoi dorën për dheu. Pastaj e shpëlau gojën dhe hundën, lau fytyrën dhe duart, e përshkoi me ujë tërë trupin e, në fund, e ndërroi vendin dhe i lau të dy këmbët.”

Muhamed ibn Muthena na ka thënë: Na ka treguar Ebu Asimi, e ky nga Handhale, e ky nga Kasimi se Aishja (Allahu qoftë i kënaqur me të!) ka thënë: “Kur Pejgamberi ﷺ pastrohej nga xhunubllëku, kërkonte enë sikurse mjelca. Merrte ujë me grusht (prej saj). Fillonte nga ana e djathtë e kokës, vazhdonte nga e majta dhe me duar e fërkonte kokën.”

Omer ibn Hafs ibn Gijathi na ka thënë: Na ka treguar babai im, e këtij i ka treguar Ameshi, e këtij i ka treguar Salimi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!) tregon: “Pejgamberit ﷺ ia përgatita ujin për pastrim. Ai, me dorën e djathtë, i hodhi ujë dorës së majtë dhe i lau të dyja, pastaj e pastroi organin gjenital dhe përshkoi dorën për dheu, e pastaj e lau. E shpëlau gojën dhe hundën, e lau fytyrën dhe hodhi ujë mbi kokë. Pastaj u zhvendos nga ku ishte dhe i lau këmbët. Në fund, i sollën një peshqir, por nuk u fshi me të.”

Humejdiu na ka thënë: Na ka treguar Sufjani, e këtij i ka treguar Ameshi, e ky nga Salim ibn Ebu Xhadi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!) tregon se Pejgamberi ﷺ u pastrua nga xhunubllëku duke larë organin gjenital me dorën e tij, pastaj përshkoi dorën për muri dhe sërish e lau me ujë. Mori abdes, siç merrte për namaz e, pasi e përfundoi guslin, i lau edhe këmbët.

Abdullah ibn Mesleme na ka thënë: Na ka rrëfyer Eflahu, e ky nga Kasimi se Aishja (Allahu qoftë i kënaqur me të!) tregon: “Unë dhe Pejgamberi ﷺ laheshim nga një enë e përbashkët dhe na takoheshin duart e njëri-tjetrit.”

Musededi na ka thënë: Na ka treguar Hamadi, e ky nga Hishami, e ky nga babai i tij se Aishja (Allahu qoftë i kënaqur me të!) tregon se, kur i Dërguari i Allahut ﷺ pastrohej nga xhunubllëku, së pari lante duart.

Ebu Velidi na ka thënë: Na ka treguar Shuëbe, e ky nga Ebu Bekër ibn Hafsi, e ky nga Urve se Aishja (Allahu qoftë i kënaqur me të!) ka thënë: “Unë dhe Pejgamberi ﷺ pastroheshim nga xhunubllëku nga një enë e përbashkët.”

Transmetohet e njëjta gjë nga Abdurrahman ibn Kasimi e ky nga babai i tij, e ky nga Aishja.

Ebu Velidi na ka thënë: Na ka treguar Shuëbe, e ky nga Abdullah ibn Abdullah ibn Xhebri se Enes ibn Maliku (Allahu qoftë i kënaqur me të!) ka thënë: “Pejgamberi ﷺ pastrohej së bashku me ndonjërën nga gratë e tij nga një enë e përbashkët.”

Muslimi dhe Vehbiu (në transmetimin e tyre) kanë shtuar nga Shuëbe: “Nga xhunubllëku.”

Muhamed ibn Mahbubi na ka thënë: Na ka treguar Abdulvahidi, e këtij i ka treguar Ameshi, e ky nga Salim ibn Ebu Xhadi, e ky nga Kurejbi, i çrobëruari i Ibn Abasit, e ky nga Ibn Abasi se Mejmunia (Allahu qoftë i kënaqur me të!) tregon: “Të Dërguarit të Allahut ﷺ i vendosa ujë për t'u larë. Ai filloi të hedhë ujë mbi duart e tij, që i lau dy-tri herë. Pastaj, me dorën e djathtë, i hodhi ujë së majtës dhe me të lau organet gjenitale, për ta përshkuar më pas dorën e majtë për dheu. Pastaj, vazhdoi me shpëlarjen e gojës dhe hundës, i lau fytyrën dhe duart, e lau kokën tri herë dhe i hodhi ujë tërë trupit. E, në fund, u zhvendos nga vendi ku ndodhej dhe i lau këmbët.”

Musa ibn Ismaili na ka thënë: Na ka treguar Ebu Avane, e këtij i ka treguar Ameshi, e ky nga Salim ibn Ebu Xhadi, e ky nga Kurejbi, i çrobëruari i Ibn Abasit, e ky nga Ibn Abasi se Mejmune bint Harithi (Allahu qoftë i kënaqur me të!) ka thënë: “Të Dërguarit të Allahut ﷺ ia vendosa ujin për t'u larë dhe e mbulova atë (që të mos shihej). Qiti ujë në dorë dhe e lau atë një ose dy herë. - Sulejmani thotë: “Nuk di a e ka përmendur edhe herën e tretë a jo.” - Pastaj, me dorën e djathtë, qiti ujë në të majtën, me të cilën e lau organin gjenital dhe, më pas, e përshkoi dorën për toke - ose ka thënë: për muri. Pastaj shpëlau gojën dhe hundën, lau fytyrën dhe duart, lau kokën dhe i qiti ujë tërë trupit. E, në fund, u zhvendos nga vendi ku ndodhej dhe i lau këmbët. Pasi e përfundoi, i ofrova një peshqir, por bëri me dorë, kështu, dhe nuk e deshi.”

Muhamed ibn Beshari na ka thënë: Na ka treguar Ibn Ebu Adiu dhe Jahja ibn Seidi, e këta nga Shuëbe, e ky nga Ibrahim ibn Muhamed ibn Munteshiri, se babai i tij, Muhamed ibn Munteshiri ka thënë: “Ia përmenda Aishes (Allahu qoftë i kënaqur me të!) (qëndrimin kritik të Ibn Omerit ndaj parfumimit gjatë ihramit) e më tha: “Allahu e mëshiroftë Ebu Abdurrahmanin! Unë e parfumoja të Dërguarin e Allahut ﷺ, pastaj shkonte te gratë e veta (bënte marrëdhënie e, pasi pastrohej), vishte ihramin, ndërsa era e parfumit vazhdonte t'i erëmonte.”

Muhamed ibn Beshari na ka thënë: Na ka treguar Muadh ibn Hishami, e këtij i ka treguar babai i tij, e ky nga Katadja se Enes ibn Maliku (Allahu qoftë i kënaqur me të!) tregon: “Pejgamberi ﷺ gjatë një pjese të ditës ose natës bënte marrëdhënie me gratë e tij, të cilat kanë qenë njëmbëdhjetë.” I thashë Enesit: “A mund ta bënte këtë?” Ai tha: “Nëpër bisedat tona përmendnim se Pejgamberit ﷺ i është dhënë fuqia e tridhjetë burrave.”

Seidi transmeton nga Katadja se Enesi u ka thënë: “Ato kanë qenë nëntë gra.”

Ebu Velidi na ka thënë: Na ka treguar Zaide, e ky nga Ebu Hasini, e ky nga Ebu Abdurrahmani se Aliu (Allahu qoftë i kënaqur me të!) ka thënë: “Shpesh më rridhte lëngu paraspermal, andaj porosita një person të pyeste Pejgamberin ﷺ, (sepse kisha turp) për shkak të bijës së tij.” Ai iu përgjigj: “Merr abdes dhe pastroje organin gjenital.”

Ebu Numani na ka thënë: Na ka treguar Ebu Avane, e ky nga Ibrahim ibn Muhamed ibn Munteshiri, se babai i tij, Muhamed ibn Munteshiri ka thënë: “E pyeta Aishen (Allahu qoftë i kënaqur me të!) rreth fjalës së Ibn Omerit: “Nuk më pëlqen të hyj në ihram e të më vijë era parfum.” Aishja m'u përgjigj: “Unë e parfumoja të Dërguarin e Allahut ﷺ, pastaj ai bënte marrëdhënie me gratë e veta (pastaj lahej) dhe, në fund, hynte në ihram.”

Ademi na ka thënë: Na ka treguar Shuëbe, e këtij i ka treguar Hakemi, e ky nga Ibrahimi, e ky nga Esvedi se Aishja (Allahu qoftë i kënaqur me të!) ka thënë: “Ende më duket sikur shoh shkëlqimin e parfumit në flokët e Pejgamberit ﷺ duke qenë në ihram.”

Abdani na ka thënë: Na ka rrëfyer Abdullahu, e këtij i ka rrëfyer Hisham ibn Urve, e ky nga babai i vet se Aishja (Allahu qoftë i kënaqur me të!) ka thënë: “Kur i Dërguari i Allahut ﷺ pastrohej nga xhunubllëku, së pari fillonte nga duart, pastaj merrte abdes sikurse për namaz, pastaj lahej: shpupurishte flokët me dorë (që të depërtonte uji) e, kur sigurohej se kishte larë lëkurën e kokës, i hidhte ujë kokës tri herë dhe, më pas, e pastronte tërë trupin me ujë.” Aishja tha: "Lahesha me Pejgamberin ﷺ dhe merrnim ujë nga ena e njëjtë së bashku."

Aishja (Allahu qoftë i kënaqur me të!) tregon: “Unë dhe Pejgamberi ﷺ laheshim nga një enë e përbashkët, nga e cila merrnim ujë së bashku.”

Jusuf ibn Isai na ka thënë: Na ka rrëfyer Fadël ibn Musai, e këtij i ka rrëfyer Ameshi, e ky nga Salimi, e ky nga Kurejbi, i çrobëruari i Ibn Abasit, e ky nga Ibn Abasi se Mejmunia (Allahu qoftë i kënaqur me të!) tregon: “I Dërguari i Allahut ﷺ e vuri ujin për t'u larë nga xhunubllëku, e në atë rast me dorën e djathtë i qiti ujë së majtës dy-tri herë dhe lau organin gjenital, pastaj e përshkoi dorën e majtë për dheu, - ose ka thënë: për muri, - dy-tri herë. Pastaj vazhdoi me shpëlarjen e gojës dhe hundës, lau fytyrën dhe duart deri te bërrylat, derdhi ujë në kokën e tij pastaj e lau tërë trupin. E, në fund, u zhvendos nga vendi ku ndodhej dhe i lau këmbët. (Pasi e përfundoi), i ofrova një arnë (si peshqir), por nuk e deshi dhe me dorë filloi ta shkundte ujin nga trupi.”

Abdullah ibn Muhamedi na ka thënë: Na ka treguar Othman ibn Omeri, e këtij i ka rrëfyer Junusi, e ky nga Zuhriu, e ky nga Ebu Seleme se Ebu Hurejra (Allahu qoftë i kënaqur me të!) tregon: “Një ditë u thirr ikameti për namaz, u drejtuan safat dhe i Dërguari i Allahut ﷺ erdhi për të na falur namazin. Kur u drejtua në vendfalje (për të na prirë në namaz), iu kujtua se është xhunub, ndaj na tha: “Qëndroni në vendet tuaja!” Shkoi dhe u pastrua. Kur u kthye, koka ende i pikonte ujë. Mori tekbirin fillestar dhe ne u falëm me të.”

Transmetimin e Othman ibn Omerit e forcon Abdulalai, e ky nga Mameri, e ky nga Zuhriu. Po ashtu Evzaiu e transmeton nga Zuhriu.

Abdani na ka thënë: Na ka rrëfyer Ebu Hamzai, e ky e ka dëgjuar Ameshin, e ky nga Salimi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!) ka thënë: “Pejgamberit ﷺ ia vura ujin për t'u larë dhe e mbulova atë me një rrobë (që të mos shihej). U qiti ujë duarve dhe i lau. Pastaj, me dorën e djathtë, qiti ujë në dorën e tij të majtë dhe e lau organin gjenital, pastaj e përshkoi dorën për dheu dhe e fshiu atë. Pastaj, e lau dorën. Në vazhdim, shpëlau gojën dhe hundën, lau fytyrën dhe duart deri në bërryla, derdhi ujë në kokën e tij pastaj i qiti ujë tërë trupit. E, në fund, u zhvendos nga vendi ku ndodhej dhe i lau këmbët. Pasi e përfundoi, i ofrova një rrobë (si peshqir), por nuk e deshi dhe u largua duke i shkundur duart.”

Halad ibn Jahjai na ka thënë: Na ka treguar Ibrahim ibn Nafiu, e ky nga Hasen ibn Muslimi, e ky nga Safije bint Shejbe se Aishja (Allahu qoftë i kënaqur me të!) tregon: “Kur ndonjëra prej nesh bëhej xhunub, me dy duart hidhte ujë në kokë tri herë, pastaj, me njërën dorë, hidhte ujë në anën e djathtë, si dhe, me dorën tjetër, në anën e majtë.”

Is'hak ibn Nasri na ka thënë: Na ka treguar Abdurrezaku, e ky nga Mameri, e ky nga Hemam ibn Munebihu se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Benu israilët e kanë pasur zakon që të zhveshur të laheshin duke parë kështu njëri-tjetrin, kurse Musai ﷺ pastrohej i vetëm. Thanë: “Betohemi në Allahun se Musai nuk po lahet së bashku me ne sepse është me të meta (në organet gjenitale).”

Një ditë, kur Musai shkoi të lahej, e vendosi rrobën e vet në një gur dhe guri filloi të ikë së bashku me rrobën e tij. Musai filloi të vrapojë pas tij duke thirrur: “Rrobën time, o gur! Rrobën time, o gur!” - derisa benu israilët e panë Musain dhe thanë: “Betohemi në Allahun se Musai nuk paska asnjë mangësi.” Pasi e kapi gurin, Musai e mori rrobën e tij dhe filloi ta godasë gurin.”

Ebu Hurejra thotë: “Betohem në Allahun se në atë gur kishte shenja të atyre gjashtë-shtatë goditjeve.”

Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Një ditë, teksa Ejubi ﷺ po lahej i zhveshur, para tij ranë disa karkaleca të artë. Ejubi filloi t'i tubojë me dorë në rrobën e tij. Atëherë Zoti i tij e thirri: “O Ejub! A nuk të kam dhënë mjaftueshëm, që të mos kesh nevojë për këto që po sheh?” Ai tha: “Posi, o Zoti im! Por, nuk ngopem dot nga begatitë e Tua.”

Ibrahimi e transmeton nga Musa ibn Ukbe, e ky nga Safvani, e ky nga Ata ibn Jesari, e ky nga Ebu Hurejra se Pejgamberi ﷺ ka thënë: “Një ditë, teksa Ejubi ﷺ po lahej i zhveshur.”

Abdullah ibn Mesleme na ka treguar se Maliku ka transmetuar nga Ebu Nadri, i çrobëruari i Omer ibn Ubejdullahut, e këtij i ka rrëfyer Ebu Murra, i çrobëruari i Umu Hanit, se Umu Hani bint Ebu Talibi (Allahu qoftë i kënaqur me të!) ka thënë: “Në vitin e Çlirimit (të Mekës) shkova te Pejgamberi ﷺ, të cilin e gjeta duke u larë, kurse Fatimja po e mbulonte me një rrobë (që të mos shihej). Ai tha: “Kush është kjo?”

- Jam unë, Umu Hani, - i thashë.”

Abdani na ka thënë: Na ka rrëfyer Abdullahu, e këtij i ka rrëfyer Sufjani, e ky nga Ameshi, e ky nga Salim ibn Ebu Xhadi, e ky nga Kurejbi, e ky nga Ibn Abasi se Mejmunia (Allahu qoftë i kënaqur me të!) ka thënë: “Pejgamberin ﷺ e mbulova me një rrobë (që të mos shihej) teksa po pastrohej nga xhunubllëku. Fillimisht, lau duart, pastaj, me dorën e djathtë i qiti ujë së majtës, lau organin gjenital dhe pjesët e përlyera përreth, pastaj e përshkoi dorën për muri, - ose ka thënë për toke. Në vazhdim, mori abdes, siç merrte për namaz, përveç këmbëve, dhe i hodhi ujë tërë trupit. E, në fund, u zhvendos (nga vendi ku ndodhej) dhe i lau këmbët.”

Transmetimin e Sufjanit e forcojnë Ebu Avane dhe Ibn Fudajli, në lidhje me mbulimin.

Abdullah ibn Jusufi na ka thënë: Na ka rrëfyer Maliku, e ky nga Hisham ibn Urve, e ky nga babai i vet, e ky nga Zejnebe bint Ebu Seleme se Umu Seleme, nëna e besimtarëve (Allahu qoftë i kënaqur me të!), ka thënë: “Umu Sulejmi, gruaja e Ebu Talhait, erdhi te Pejgamberi ﷺ dhe i tha: “O i Dërguari i Allahut! Allahu nuk turpërohet nga e vërteta. Andaj, a i obligohet femrës gusli nëse ejakulon në gjumë?” Pejgamberi ﷺ i tha: “Po, nëse sheh se është lagur.”

Ali ibn Abdullahu na ka thënë: Na ka treguar Jahjai, e këtij i ka treguar Humejdi, e këtij i ka treguar Bekri, e ky nga Ebu Rafiu se Ebu Hurejra (Allahu qoftë i kënaqur me të!) tregon se e takoi Pejgamberin ﷺ në një prej rrugëve të Medinës duke qenë xhunub: “Iu përvodha e shkova u lava, pastaj vajta te Pejgamberi ﷺ, i cili më tha: “Ku ishe, o Ebu Hurejre?”

Thashë: “Isha xhunub, andaj nuk doja të qëndroja me ty duke qenë i papastër.”

Pejgamberi ﷺ tha: “Subhanallah! Besimtari nuk bëhet i ndytë.”

Abdulala ibn Hamadi na ka thënë: Na ka treguar Jezid ibn Zureji, e këtij i ka treguar Seidi, e ky nga Katadja se Enes ibn Maliku (Allahu qoftë i kënaqur me të!) tregon se Pejgamberi ﷺ bënte marrëdhënie me të gjitha gratë e tij brenda një nate të vetme. Atëkohë ato ishin nëntë sosh.

Ajashi na ka thënë: Na ka treguar Abdulalai, e këtij i ka treguar Humejdi, e ky nga Bekri, e ky nga Ebu Rafiu se Ebu Hurejra (Allahu qoftë i kënaqur me të!) tregon: “I Dërguari i Allahut ﷺ më takoi teksa isha xhunub. Më kapi për dore dhe ecëm së bashku derisa u ul diku. Iu përvodha disi dhe shkova në shtëpi e u pastrova. Kur u ktheva, teksa po qëndronte ulur, më tha: “Ku ishe, o Ebu Hurejre?”

Ia tregova arsyen e largimit.

Ai më tha: “Subhanallah, o Ebu Hurejre! Besimtari nuk bëhet i ndytë.”

Ebu Nuajmi na ka thënë: Na kanë treguar Hishami dhe Shejbani, e këta dy nga Jahjai se Ebu Seleme thotë: “E pyeta Aishen (Allahu qoftë i kënaqur me të!): “A binte Pejgamberi ﷺ për të fjetur duke qenë xhunub?” Ajo më tha: “Po, vetëm merrte abdes.”

Kutejbe na ka thënë: Na ka treguar Lejthiu, e ky nga Nafiu, e ky nga Ibn Omeri se Omer ibn Hatabi (Allahu qoftë i kënaqur me të!) e ka pyetur Pejgamberin ﷺ: “A na lejohet të flemë duke qenë xhunub?”

Pejgamberi ﷺ iu përgjigj: “Po, nëse dikush merr abdes, mund të flejë, edhe nëse është xhunub.”

Jahja ibn Bukejri na ka thënë: Na ka treguar Lejthiu, e ky nga Ubejdullah ibn Ebu Xhaferi, e ky nga Muhamed ibn Abdurrahmani, e ky nga Urve se Aishja (Allahu qoftë i kënaqur me të!) ka thënë: “Kur Pejgamberi ﷺ donte të flinte, ndërkohë ishte xhunub, së pari e lante organin gjenital, pastaj merrte abdes sikurse për namaz.”

Musa ibn Ismaili na ka thënë: Na ka treguar Xhuvejriu, e ky nga Nafiu se Abdullahu (Allahu qoftë i kënaqur me të!) ka thënë: “Omeri e pyeti Pejgamberin ﷺ: “A na lejohet të flemë duke qenë xhunub?”

Ai i tha: “Po, nëse merr abdes.”

Abdullah ibn Jusufi na ka thënë: Na ka rrëfyer Maliku, e ky nga Abdullah ibn Dinari se Abdullah ibn Omeri (Allahu qoftë i kënaqur me të!) tregon se Omer ibn Hatabi i përmendi të Dërguarit të Allahut ﷺ se ndonjëherë bëhet xhunub gjatë natës, e në atë rast i Dërguari i Allahut ﷺ i tha: “Merr abdes dhe pastroje organin gjenital, pastaj fli.”

Muadh ibn Fedale na ka thënë: Na ka treguar Hishami. [t]: Ebu Nuajmi na ka thënë: Na ka treguar Hishami, e ky nga Katadja, e ky nga Haseni, e ky nga Ebu Rafiu se Ebu Hurejra (Allahu qoftë i kënaqur me të!) transmeton se Pejgamberi ﷺ ka thënë: “Kur të shtrihet sipër saj dhe bën marrëdhënie me të, obligohet gusli.”

Amri e transmeton nga Shuëbe me tekst të njëjtë duke e forcuar kështu transmetimin e Hishamit. Ndërkaq, Musai ka thënë: “Na ka treguar Ebani, e këtij i ka treguar Katadja, e këtij i ka rrëfyer Haseni, me tekst të njëjtë.”

Ebu Mameri na ka thënë: Na ka treguar Abdulvarithi, e ky nga Husejni, e ky nga Jahjai se ka thënë: Më ka rrëfyer Ebu Seleme, e këtij i ka rrëfyer Ata ibn Jesari se Zejd ibn Halid Xhuheniu tregon se e ka pyetur Othman ibn Afanin (Allahu qoftë i kënaqur me të!): “Çfarë duhet të veprojë ai që kryen marrëdhënie me gruan e vet, por nuk ejakulon?” Othmani iu përgjigj: “Merr abdes sikurse për namaz dhe e pastron organin gjenital. Këtë e kam dëgjuar prej të Dërguarit të Allahut ﷺ.”

Pastaj e pyeta edhe Ali ibn Ebu Talibin, Zubejr ibn Avamin, Talha ibn Ubejdullahun e Ubej Ibn Kabin, që të gjithë më urdhëruan të njëjtën gjë.”

Jahjai ka thënë: “Më ka rrëfyer Ebu Seleme, e këtij i ka rrëfyer Urve ibn Zubejri, e këtij i ka rrëfyer Ebu Ejubi se e ka dëgjuar këtë nga i Dërguari i Allahut ﷺ.”

Musededi na ka thënë: Na ka treguar Jahjai, e ky nga Hisham ibn Urve, e këtij i ka rrëfyer babai i tij, e këtij i ka rrëfyer Ebu Ejubi se Ubej ibn Kabi (Allahu qoftë i kënaqur me të!) tregon se e ka pyetur Pejgamberin ﷺ: “O i Dërguari i Allahut? Çfarë duhet të veprojë nëse dikush bën marrëdhënie me gruan e vet, por nuk ejakulon?”

Ai tha: “E pastron pjesën që është përlyer prej lëngut të femrës, pastaj merr abdes dhe falet.”

Ebu Abdullahu (Buhariu) thotë: “Të marrë gusël është më e sigurt, sepse kjo është dispozita përfundimtare në këtë temë. Ndërkaq, hadithin paraprak e përmendëm për shkak të mendimeve të ndryshme që kanë ekzistuar në këtë çështje (nëse obligohet gusli kur dikush bën marrëdhënie intime pa ejakuluar).”