Sahihu i Buhariut — Hadithi 2531
7. Nënkapitulli: Nëse dikush, për robin e vet, thotë: "Po e lë për hir të Allahut", ndërkohë ka për nijet lirimin e tij, si dhe prania e dëshmitarëve me rastin e lirimit të robit
2531. Nga: Ebu Hurejra
Ubejdullah ibn Seidi na ka thënë: Na ka treguar Ebu Usame, e këtij i ka treguar Ismaili, e ky nga Kajsi se Ebu Hurejra (Allahu qoftë i kënaqur me të!) rrëfen: “Teksa shkoja te Pejgamberi ﷺ në Medinë, gjatë rrugës thosha:
"Ah, sa natë e gjatë dhe e mundimshme!
Por, më shpëtoi nga vendi i mosbesimit.”
Gjatë rrugës më iku robi, por, kur shkova në Medinë dhe iu besatova Pejgamberit ﷺ, në ndejë e sipër me të, u paraqit robi. I Dërguari i Allahut ﷺ më tha:
- “O Ebu Hurejre, ja robi yt.”
- Është i lirë për hir të Allahut, - i thashë.
Dhe kështu e liroi atë.
Ebu Abdullahu (Buhariu) ka thënë: “Në transmetimin e tij nga Ebu Usame, Ebu Kurejbi nuk ka thënë: “i lirë.”