Sahihu i Buhariut — Hadithi 30
22. Nënkapitulli: Mëkatet janë pjesë e injorancës (së kufrit), por mëkatari nuk cilësohet jobesimtar për shkak të tyre, përveç nëse bën shirk
Pejgamberi ﷺ i ka thënë (dikujt): “Me të vërtetë, ti ende ke tipare të injorancës (paraislame).” Allahu ﷻ ka thënë: “Vërtet Allahu nuk fal që t’i bëhet shirk në adhurim, ndërsa ia fal çdo gjë përveç kësaj, atij që do.” (Nisa, 48)
30. Nga: Ebu Dherr Gifariu
Sulejman ibn Harbi na ka thënë: Na ka treguar Shuëbe nga Vasili se Maruri rrëfen: “E takova Ebu Dherrin (Allahu qoftë i kënaqur me të!) në Rabedhe bashkë me shërbëtorin e tij, të dy të veshur bukur, andaj e pyeta për këtë çështje, e në atë rast më tha: “Njëherë, pata fyer dikë duke i nënçmuar të ëmën, e Pejgamberi ﷺ më pati thënë: “O Ebu Dherr, a ia nënçmove të ëmën? Me të vërtetë, ende ke tipare të kohës së injorancës (para Islamit). Shërbëtorët tuaj janë vëllezërit tuaj dhe Allahu i ka vënë nën sundimin tuaj. Andaj, nëse dikush prej jush e ka vëllanë e vet nën sundim, le ta ushqejë sikurse veten dhe le ta veshë sikurse veten. Mos i ngarkoni me më tepër sesa që mund të bartin, e, nëse veproni kështu, atëherë ndihmojini.”