Sahihu i Buhariut — Hadithi 3378
17. Nënkapitulli: Ajeti: “Fisit themud (Ne i dërguam) vëllanë e tyre, Salihun...”
Allahu i Madhërishëm ka thënë: “Edhe banorët e Hixhrit (fisi themud), i quajtën të dërguarit për gënjeshtarë.” (Hixhr, 80) “Ata thonë (sipas hamendjes së tyre): "Këto bagëti dhe këto e këto bimë janë të ndaluara, nuk mund t’i hajë askush, përveç atyre që ua lejojmë Ne...” (Enam, 138) “... Është e ndaluar çdo e mirë (ose Xheneti është haram për ju)!” (Furkan, 22)
3378. Nga: Abdullah ibn Omeri
Muhamed ibn Miskin Ebu Haseni na ka thënë: Na ka treguar Jahja ibn Hasan ibn Hajan Ebu Zekerija, e këtij i ka treguar Sulejmani, e ky nga Abdullah ibn Dinari se Ibn Omeri (Allahu qoftë i kënaqur me të!) tregon se, kur i Dërguari i Allahut ﷺ zbriti në vendbanimin e Hixhrit (vendbanimi i popullit themud), në Betejën e Tebukut, i ndaloi ushtarët të pinë ujë në pusin e këtij vendi apo të nxjerrin ujë prej tij. Ata i thanë: “Tashmë kemi gatuar ushqim me atë ujë dhe kemi nxjerrë ujë nga aty.” Por, Pejgamberi ﷺ i urdhëroi të derdhin ushqimin e gatuar dhe ujin e nxjerrë nga aty.
Po ashtu, transmetohet nga Sebra ibn Mabedi dhe Ebu Shumusi se Pejgamberi ﷺ urdhëroi që ushqimi të hidhet. Kurse Ebu Dherri transmeton nga Pejgamberi ﷺ se ka thënë: "Ai që ka përgatitur ushqim me ujin e tij.”