Sahihu i Buhariut — Hadithi 3778
1. Nënkapitulli: Virtytet e ensarëve, Allahu qoftë i kënaqur me ta!
Allahu Fuqiplotë ka thënë: - “... dhe ata që u dhanë strehim e i ndihmuan...” (Enfal, 72 dhe 74) “Ndërsa ata që banojnë në Medinë dhe që e kanë pranuar besimin qysh më parë, i duan ata që kanë bërë hixhret tek ta (në Medinë) dhe në zemrat e tyre nuk ndiejnë kurrfarë rëndimi, për atë që u është dhënë atyre...” (Hashr, 9)
3778. Nga: Enes ibn Malik Ensariu
Ebu Velidi na ka thënë: Na ka treguar Shuëbe, e ky nga Ebu Tejahu se Enesi (Allahu qoftë i kënaqur me të!) tregon: “Ditën e Çlirimit të Mekës, Pejgamberi ﷺ u dha kurejshëve shumë plaçkë.” Ensarët thanë: “Betohemi në Allahun se kjo është e çuditshme. Shpatat tona ende pikojnë gjak kurejshish, ndërkohë atyre u jepen plaçkat tona.” Pejgamberi ﷺ dëgjoi për këtë dhe i thirri ensarët, pastaj u tha: “Ç'është kjo që dëgjova prej jush?” Ata nuk gënjenin dhe u përgjigjën: “Është ashtu siç ke dëgjuar.” Pejgamberi ﷺ tha: “A nuk jeni të kënaqur që njerëzit të kthehen me plaçka në shtëpitë e tyre, ndërsa ju të ktheheni në shtëpitë tuaja me të Dërguarin e Allahut ﷺ? Sikur ensarët të ndiqnin një luginë ose një grykë, do ta ndiqja luginën ose grykën e tyre.”