Sahihu i Buhariut — Hadithi 44
33. Nënkapitulli: Shtimi dhe pakësimi i imanit
Allahu ﷻ ka thënë: “Ne ua shtuam udhëzimin në rrugën e drejtë” (Kehf, 12), “... e t’u shtohet besimi atyre që besojnë...” (Mudethir, 31), “... sot jua përsosa fenë tuaj...” (Maide, 3) Andaj, kur diçka nuk përsoset, mbetet e mangët.
44. Nga: Enes ibn Malik Ensariu
Muslim ibn Ibrahimi na ka thënë: Na ka treguar Hishami, e këtij i ka treguar Katadja se Enesi (Allahu qoftë i kënaqur me të!) transmeton se Pejgamberi ﷺ ka thënë: “Nga Zjarri do të dalë kushdo që ka thënë “la ilahe il-lallah" dhe në zemër ka pasur mirësi qoftë dhe sa kokrra e elbit. Pastaj nga Zjarri do të dalë kushdo që ka thënë “la ilahe il-lallah" dhe në zemër ka pasur mirësi qoftë dhe sa kokrra e grurit. Gjithashtu, nga Zjarri do të dalë kushdo që ka thënë “la ilahe il-lallah" dhe në zemër ka pasur mirësi qoftë dhe sa grimca.”
Ebu Abdullahu (Buhariu) ka thënë: “Ebani ka thënë: “Na ka treguar Katadja, të cilit i ka treguar Enesi prej Pejgamberit ﷺ, se në vend të fjalëve: “ka mirësi”, gjenden fjalët: “ka iman”.