Sahihu i Buhariut — Hadithi 5512

Ibn Xhurejxhi transmeton nga Atau se ka thënë: "Të dyja llojet e therjes bëhen në dy pjesë: prerja në mes të fytit (dhebhi) dhe ngulja e thikës mes fytit dhe gjoksit (nahri)¹." Unë i thashë: "A lejohet të theret me nahr ajo që duhet të theret me dhebh?" Ai tha: "Po, sepse Allahu e ka përmendur therjen e lopës me dhebh, por, edhe nëse ther me nahr diçka që në parim duhet të theret me dhebh, lejohet. Mirëpo, unë e preferoj nahrin. Në anën tjetër, dhebhi nënkupton prerjen e dy damarëve të fytit." Thashë: "Pasi t'i presim damarët, a ta presim edhe palcën e kurrizit?" Ai tha: "Nuk mendoj ashtu." Ibn Omeri ka ndaluar që të pritet palca dhe ka thënë: "Pritet ajo që ndodhet para ashtit dhe lihet ashtu derisa të ngordhë." Fjala e Allahut të Lartësuar: “E, kur Musai i tha kombit të vet: "Allahu, me të vërrtetë ju urdhëron të therrni një lopë, - ata thanë: "A don të tallesh me ne?" – Zoti më ruajtë! tha Musai të bëhem unë me grupin e injorantëve (me ata që ia mveshin Allahut atë që s’e ka thënë). Ata thanë: "Lutju Zotit tënd, që të na shpjegojë qysh është ajo (lopë)." Musai tha: "Ajo është një lopë as plakë as e re, por e mesme; pra bëi atë që u është urdhëruar!" Ata thanë: "Lutju Zotit tënd, që të na shpjegojë çfarë ngjyre ka ajo!" Musai tha: "Me të vërtetë Ai, (Allahu) thotë se ajo është lopë ngjyra e së cilës është tejet e verdhë, të cilën e pëlqejnë shikuesit." Ata (përsëri) thanë: "Lutju Zotit tënd, që të na shpjegoje çfarë është ajo, sepse, lopët po i gjasojnë (njëra-tjetrës) e ne, në dashtë Zoti, do të udhëzohemi në rrugën e drejtë (si jemi urdhëruar)." Ai (Musai) tha: "Me të vërtetë Ai (Allahu) thotë se ajo lopë nuk është e lodhur nga lavra, as nga ujitja e tokës; s’ka të metë dhe kurrfarë shenjë në të." Ata thanë: "Tani na the të vërtetën. E prenë lopën; por për një fije nuk dashtën ta bënin këtë.” (Bekare, 67-71) Ibn Abasi ka thënë: "Prerja bëhet midis fytit dhe hapësirës rrëzë gjoksit." Ibn Omeri, Ibn Abasi dhe Enesi kanë thënë: "Edhe nëse ia këput kokën krejt, s’ka problem."

(1) Dhebhi është therja që bëhet te lopët, delet dhe kafshët e tjera, kurse nahri, në parim, bëhet te devetë.