Sahihu i Buhariut — Hadithi 7154
11. Nënkapitulli: Transmetimet që tregojnë se Pejgamberi ﷺ nuk ka pasur portier (pranë derës)
7154. Nga: Enes ibn Malik Ensariu
Is'hak ibn Mensuri na ka thënë: Na ka rrëfyer Abdusamedi, e këtij i ka treguar Shuëbe, e këtij i ka treguar Thabit Bunaniu se Enes ibn Maliku (Allahu qoftë i kënaqur me të!) pyeti një familjare të tij: “A e njeh filanen?” Ajo tha: “Po.” Enesi i tha: “Njëherë, Pejgamberi ﷺ pati kaluar pranë saj, ndërkohë ajo qante te një varr, e i pati thënë:
- “Ki frikë Allahun dhe duro!”
- Largohu prej meje, se ty nuk të ka goditur fatkeqësi si kjo imja! - ia pati kthyer ajo.
Pejgamberi ﷺ vazhdoi rrugën dhe u largua prej saj. Pastaj pranë saj kaloi një burrë dhe i tha: “Çfarë të tha i Dërguari i Allahut?”
- Nuk e paskam njohur, - ia ktheu ajo.
- Ai është i Dërguari i Allahut ﷺ, - tha ai.
Sakaq, ajo i vajti te dera, por nuk gjeti aty portier, (andaj hyri brenda) dhe i tha: “O i Dërguari i Allahut! Betohem në Allahun se nuk të kam njohur!”
Pejgamberi ﷺ i tha: “Durimi është në goditjen e parë.”