Sahihu i Buhariut — Hadithi 971
12. Nënkapitulli: Këndimi i tekbireve ditëve të qëndrimit në Mina dhe gjatë shkuarjes në Arafat
Omeri bënte tekbire në tendën e tij në Mina, saqë e dëgjonin edhe njerëzit në xhami, të cilët po ashtu bënin tekbire. Gjithashtu, njerëzit në treg bënin tekbire, saqë tërë Mina ushtonte nga tekbiret. Ibn Omeri gjatë këtyre ditëve bënte tekbire në Mina, pas namazeve, në shtrat, në tendë, në ndeja dhe gjatë ecjes. Mejmunja bënte tekbire ditën e Bajramit të Kurbanit. Gratë, ditëve të Bajramit, bënin tekbire me burrat në xhami, prapa Eban ibn Othmanit e Omer ibn Abdulazizit.
971. Nga: Umu Atija Ensarja
Muhamedi na ka thënë: Na ka treguar Omer ibn Hafsi, e këtij i ka treguar babai i tij, e ky nga Asimi, e ky nga Hafsa se Umu Atija (Allahu qoftë i kënaqur me të!) tregon: “Urdhëroheshim të dilnim ditën e Bajramit, saqë dilnin edhe vashat e reja nga veçanet, e edhe ato me menstruacione, e të gjitha qëndronin mbrapa turmës së njerëzve, ku bënin tekbire dhe dua me ta. Shpresonin bekimin dhe faljen (e mëkateve) në atë ditë.”