Hadithet e ngjashme me hadithin 139

Kutejbe na ka thënë: Na ka treguar Ismail ibn Xhaferi, e ky nga Muhamed ibn Ebu Harmele, e ky nga Kurejbi, i çrobëruari i Ibn Abasit se Usame ibn Zejdi (Allahu qoftë i kënaqur me të!) tregon: “Së bashku me të Dërguarin e Allahut ﷺ, prej Arafatit, hipa mbrapa në kafshën e tij. Kur Pejgamberi ﷺ arriti te ana e majtë e qafëmalit që ndodhet nën Muzdelife, u ndal dhe urinoi. Pasi erdhi, i hodha ujë për abdes. Mori abdes shpejt dhe i thashë: “Namazin, o i Dërguari i Allahut!” Ai tha: “Namazin do ta falim më tutje.”

Hipi sërish në kafshë, derisa arriti në Muzdelife, ku e fali namazin. Pastaj, mëngjesin tjetër, Fadli qe ai që hipi me të Dërguarin e Allahut ﷺ në kafshën e tij.”

Musededi na ka thënë: Na ka treguar Hamad ibn Zejdi, e ky nga Jahja ibn Seidi, e ky nga Musa ibn Ukbe, e ky nga Kurejbi, i çrobëruari i Ibn Abasit se Usame ibn Zejdi (Allahu qoftë i kënaqur me të!) tregon se, kur Pejgamberi ﷺ u largua prej Arafatit, lakoi rrugën për te qafëmali, ku u ndal për ta kryer nevojën. Pasi mori abdes, e pyeta: “O i Dërguari i Allahut, a do të falesh?”

- “Namazin do ta falim më tutje”, - tha Pejgamberi ﷺ.

Abdullah ibn Jusufi na ka thënë: Na ka rrëfyer Maliku, e ky nga Musa ibn Ukbe, e ky nga Kurejbi se Usame ibn Zejdi (Allahu qoftë i kënaqur me të!) tregon: “I Dërguari i Allahut ﷺ u nis prej Arafatit dhe (gjatë rrugës) u ndal te qafëmali, ku urinoi dhe mori abdes në formë jo të përkryer.” E pyeta: “A do të falesh?”

- “Namazin do ta falim më tutje”, - tha Pejgamberi ﷺ.

Kur arriti në Muzdelife, mori abdes në formë të përkryer, u thirr ikameti dhe e fali akshamin. Pastaj, të gjithë njerëzit i pushuan devetë, secili te tenda e vet. Sërish u thirr ikameti, e në atë rast Pejgamberi ﷺ u fal (namazin e jacisë), pa falur diçka tjetër mes tyre (akshamit dhe jacisë).”

Abdullah ibn Mesleme na ka treguar nga Maliku, e ky nga Musa ibn Ukbe, e ky nga Kurejbi, i çrobëruari i Ibn Abasit, se Usame ibn Zejdi (Allahu qoftë i kënaqur me të!) tregon: “I Dërguari i Allahut ﷺ u largua prej Arafatit derisa arriti te qafëmali, tek u ndal dhe urinoi, pastaj mori abdes shkarazi.” I thashë: “Namazin, o i Dërguari i Allahut!” Ai tha: “Namazin do ta falim më tutje.” Kështu, hipi mbi kafshë e udhëtoi, derisa arriti në Muzdelife, ku zbriti, mori abdes duke e përsosur atë. Pasi u thirr ikameti për namaz, e fali namazin e akshamit dhe çdonjëri e pushoi devenë afër tendës së vet. Pas kësaj u thirr ikameti sërish dhe e fali jacinë, e nuk fali asgjë mes tyre.”

Muhamed ibn Selami na ka thënë: Na ka rrëfyer Jezid ibn Haruni, e ky nga Jahjai, e ky nga Musa ibn Ukbe, e ky nga Kurejbi, i çrobëruari i Ibn Abasit, se Usame ibn Zejdi (Allahu qoftë i kënaqur me të!) tregon: “Kur i Dërguari i Allahut ﷺ u largua nga Arafati, u skajua në një qafëmal dhe e kreu nevojën. Pastaj unë i hodha ujë për të marrë abdes dhe i thashë: “O i Dërguari i Allahut, a do të falesh?” Ai tha: “Namazin do ta falim më tutje.”