Hadithet e ngjashme me hadithin 1553

Sulejman ibn Davud Ebu Rabiu na ka thënë: Na ka treguar Fulejhu se Nafiu tregon se, kur Ibn Omeri (Allahu qoftë i kënaqur me të!) dëshironte të shkonte në Mekë, i lyente flokët me vaj pa aromë, shkonte në xhaminë e Dhul Hulejfes dhe falej. Pastaj hipte në kafshën e tij dhe, me t'u ngritur ajo në këmbë, hynte në ihram. Më pas thoshte: “Kështu e kam parë Pejgamberin ﷺ duke vepruar.”

Musededi na ka thënë: Na ka treguar Jahjai, e ky nga Ubejdullahu se Nafiu ka thënë: “Ibn Omeri (Allahu qoftë i kënaqur me të!) tregon se Pejgamberi ﷺ bujti në Dhu Tuva. Pastaj, në mëngjes, hyri në Mekë. Kështu vepronte edhe Ibn Omeri.”

Jakub ibn Ibrahimi na ka thënë: Na ka treguar Ibn Uleje, e këtij i ka rrëfyer Ejubi se Nafiu tregon: “Kur Ibn Omeri (Allahu qoftë i kënaqur me të!) hynte në vendin ku fillonte haremi, e ndalte telbijen. Bunte në Dhu Tuva, ku e falte namazin e sabahut, dhe pastrohej. Thoshte se kështu ka vepruar Pejgamberi ﷺ.”

Ebu Mameri na ka thënë: Na ka treguar Abdulvarithi, e këtij i ka treguar Ejubi se Nafiu tregon: “Pasi Ibn Omeri (Allahu qoftë i kënaqur me të!) e falte sabahun në Dhul Hulejfe, urdhëronte t'ia përgatisnin devenë e tij, së cilës i hipte dhe, kur ajo ngrihej në këmbë, drejtohej nga kibla dhe shqiptonte telbijen derisa arrinte në Mekë. Aty ndalej (së shqiptuari telbijen), derisa arrinte në Dhu Tuva, ku bunte dhe, pasi e falte sabahun, lahej. Thoshte se në këtë mënyrë ka vepruar i Dërguari i Allahut ﷺ.”

Sa i përket larjes (së Pejgamberit ﷺ në Dhu Tuva) transmetimin (e Abdulvarithit) e ka fuqizuar Ismaili nga Ejubi.