Hadithet e ngjashme me hadithin 1663

Lejthiu na ka thënë: Më ka treguar Ukajli, e ky nga Ibn Shihabi se Salimi tregon: “Në vitin kur Haxhaxh ibn Jusufi e sulmoi Ibn Zubejrin, e pyeti Abdullahun: “Çfarë vepron në Arafat ditën e Arafatit?” Unë i thashë: “Nëse do ta praktikosh Sunetin, atëherë fale namazin në pikun e vapës (pasi të hyjë koha e drekës). Abdullah ibn Omeri (Allahu qoftë i kënaqur me të!) tha: Ashtu është. Sunet është të bashkohet dreka me ikindinë.”

Ibn Shihabi thotë: “E kam pyetur Salimin: “A ka vepruar kështu i Dërguari i Allahut ﷺ?”

- Vallë, a e pasoni me këtë (bashkimin e namazit dhe faljen e tij në fillim të hyrjes së kohës së tij) përveçse Sunetin e tij? - tha Salimi.

Abdullah ibn Mesleme na ka thënë: Na ka rrëfyer Maliku, e ky nga Ibn Shihabi se Salim ibn Abdullahu tregon se Abdulmelik ibn Mervani i dërgoi një letër Haxhaxhit (për t'i thënë) që ta pasojë Abdullah ibn Omerin (Allahu qoftë i kënaqur me të!) në çështje të haxhit. Ditën e Arafatit isha me Ibn Omerin kur, pasi dielli kaloi zenitin, vajti te tenda e Haxhaxhit dhe thirri:

- Ku është ky?

Haxhaxhi doli, e në atë rast Ibn Omeri i tha: “Të largohemi (nga këtu).”

- Tani?! - pyeti Haxhaxhi.

- Po.

- Më prit pak, derisa të lahem.

Ibn Omeri zbriti (nga kafsha e tij dhe priti) derisa erdhi Haxhaxhi, i cili filloi të ecë mes meje dhe babait tim. (Salimi thotë:) I thashë: “Nëse do ta praktikosh Sunetin sot, shkurtoje hutben dhe ngute qëndrimin (faljen e namazit, në mënyrë që të shpejtosh për te vendi i qëndrimit në Arafat).” Ibn Omeri tha: “Ashtu është.”

Abdullah ibn Jusufi na ka thënë: Na ka rrëfyer Maliku, e ky nga Ibn Shihabi se Salimi tregon: “Abdulmeliku i dërgoi një letër Haxhaxhit (ku i thoshte) të mos e kundërshtonte Ibn Omerin për çështje të haxhit. Ditën e Arafatit isha me Ibn Omerin (Allahu qoftë i kënaqur me të!) kur, pasi dielli e kishte kaluar pikën e tij kulmore, vajti te tenda e Haxhaxhit dhe thirri. Haxhaxhi doli i mbështjellë me gunë të lyer me shafran dhe tha: “Çfarë ke, o Ebu Abdurrahman?”

- Të largohemi (nga këtu), nëse dëshiron ta praktikosh Sunetin, - iu përgjigj Ibn Omeri.

- Në këtë kohë?! - pyeti Haxhaxhi.

- Po.

- E po, më prit pak, derisa të lahem dhe të dal.

Ibn Omeri zbriti (nga kafsha e tij) dhe priti derisa doli Haxhaxhi, i cili filloi të ecë mes meje dhe babait tim. (Salimi thotë:) I thashë: “Nëse do ta praktikosh Sunetin, shkurtoje hutben dhe ngute qëndrimin (faljen e namazit, në mënyrë që të shpejtosh për te vendi i qëndrimit në Arafat).” Ai e shikoi Abdullahun dhe, kur e vërejti këtë, Abdullahu tha: “Ashtu është.”