Hadithet e ngjashme me hadithin 987

Ahmedi na ka thënë: Na ka treguar Ibn Vehbiu, e këtij i ka rrëfyer Amri, e këtij i ka treguar Muhamed ibn Abdurrahman Esediu, e ky nga Urve se Aishja (Allahu qoftë i kënaqur me të!) tregon: “Një ditë, i Dërguari i Allahut ﷺ erdhi tek unë, ndërsa në shtëpinë time dy goca të vogla po këndonin këngë (të vjetra) të Buathit. Ai u shtri dhe ktheu shikimin në anën tjetër. Më pas, erdhi Ebu Bekri dhe filloi të më bërtasë: “A zëri i shejtanit në shtëpinë e Pejgamberit ﷺ?!”

I Dërguari i Allahut ﷺ iu drejtua: “Lëri!” Pasi u hutua, ua bëra me shenjë (gocave) dhe dolën.”

Jahja ibn Bukejri na ka thënë: Na ka treguar Lejthiu, e ky nga Ukajli, e ky nga Ibn Shihabi, e ky nga Urve se Aishja (Allahu qoftë i kënaqur me të!) tregon se një ditë, në Mina, i vajti Ebu Bekri, e në atë rast hasi dy goca të vogla duke kënduar me def. Ndërkohë, Pejgamberi ﷺ ishte i shtrirë dhe i mbuluar me një rrobë. Kur (Ebu Bekri) i qortoi ato, Pejgamberi ﷺ e zbuloi fytyrën dhe i tha: “O Ebu Bekër! Lëri, se këto janë ditë feste.” Ato ditë ishin ditë Bajrami në Mina.

Ubejd ibn Ismaili na ka thënë: Na ka treguar Ebu Usame, e ky nga Hishami, e ky nga babai i tij se Aishja (Allahu qoftë i kënaqur me të!) tregon: “Njëherë, në një ditë Bajrami, Ebu Bekri erdhi tek unë, e në atë rast gjeti dy goca të vogla ensare duke kënduar histori të ndodhisë së Buathit, ndonëse nuk ishin këngëtare.”

Ebu Bekri tha: “A zëri i shejtanit në shtëpinë e të Dërguarit të Allahut ﷺ?!” Ajo ishte ditë Bajrami.

- “O Ebu Bekër, çdo popull ka festat e veta, e kjo festë është jona”, - ia ktheu i Dërguari i Allahut ﷺ.”