Sahihu i Buhariut — Hadithi 1567
34. Nënkapitulli: Llojet e haxhit temetu, kiran dhe ifrad; ndërrimi i llojit të haxhit për atë që nuk e ka marrë kurbanin me vete
1567. Nga: Abdullah ibn Abasi
Ademi na ka thënë: na ka treguar Shuëbe se Ebu Xhemra, Nasër ibn Imran Dubaiu, tregon: “U nisa për haxh temetu, por disa njerëz më ndaluan. Shkova për ta pyetur Ibn Abasin (Allahu qoftë i kënaqur me të!) rreth kësaj, e ai më urdhëroi (për ta kryer haxhin temetu). Më pas, kam parë në ëndërr një njeri duke më thënë: “Haxh të pranuar! Umre të pranuar!”
I tregova Ibn Abasit për këtë, e në atë rast më tha:
- Kështu është Suneti i Ebu Kasimit ﷺ. Qëndro tek unë të të jap diçka prej pasurisë sime.
Shuëbe ka thënë: (I thashë Ebu Xhemres): “Përse?”
- Për ëndrrën që kam parë (t'ua rrëfeja atë të tjerëve që vinin tek Ibn Abasi), - më tha.”