Hadithet e ngjashme me hadithin 1567

Ademi na ka thënë: na ka treguar Shuëbe se Ebu Xhemra, Nasër ibn Imran Dubaiu, tregon: “U nisa për haxh temetu, por disa njerëz më ndaluan. Shkova për ta pyetur Ibn Abasin (Allahu qoftë i kënaqur me të!) rreth kësaj, e ai më urdhëroi (për ta kryer haxhin temetu). Më pas, kam parë në ëndërr një njeri duke më thënë: “Haxh të pranuar! Umre të pranuar!”

I tregova Ibn Abasit për këtë, e në atë rast më tha:

- Kështu është Suneti i Ebu Kasimit ﷺ. Qëndro tek unë të të jap diçka prej pasurisë sime.

Shuëbe ka thënë: (I thashë Ebu Xhemres): “Përse?”

- Për ëndrrën që kam parë (t'ua rrëfeja atë të tjerëve që vinin tek Ibn Abasi), - më tha.”

Is'hak ibn Mensuri na ka thënë: Na ka rrëfyer Nadri, e këtij i ka rrëfyer Shuëbe se Ebu Xhemra tregon: “E pyeta Ibn Abasin (Allahu qoftë i kënaqur me të!) rreth haxhit temetu, e në atë rast më porositi për ta kryer po atë. E pyeta edhe për kurbanin dhe më tha: “Mund të përdoret deveja, lopa, delja ose mund të jesh ortak me dikë tjetër (në kurban). Mirëpo, u duk sikur disave nuk u pëlqeu kjo. Pastaj pashë në ëndërr sikur një njeri po thërriste: “Haxh të pranuar! Haxh temetu të pranuar!”

Vajta e i tregova Ibn Abasit, e në atë rast më tha: “Allahu ekber! Kështu është Suneti i Ebu Kasimit ﷺ.”

Ademi, Vehb ibn Xheriri dhe Gunderi e kanë transmetuar këtë hadith nga Shuëbe me shprehjen: “Umre të pranuar! Haxh të pranuar!”