Sahihu i Buhariut — Hadithi 1891
1. Nënkapitulli: Obligueshmëria e agjërimit të Ramazanit
Fjala e Allahut të Madhëruar: “O ju që besuat, ju është bërë obligim agjërimi sikurse që ishte obligim ndaj atyre para jush, që të jeni më të devotshëm.” (Bekare, 183)
1891. Nga: Talha ibn Ubejdullahu
Kutejbe ibn Seidi na ka thënë: Na ka treguar Ismail ibn Xhaferi, e ky nga Ebu Suhejli, e ky nga babai i tij se Talha ibn Ubejdullahu (Allahu qoftë i kënaqur me të!) tregon: “Një beduin flokëshprishur erdhi tek i Dërguari i Allahut ﷺ dhe i tha:
- O i Dërguari i Allahut, më trego çka më ka obliguar Allahu në lidhje me namazin?
- “Pesë namazet, përveç nëse shton diçka vullnetarisht”, - iu përgjigj Pejgamberi ﷺ.
- Më trego çka më ka obliguar Allahu në lidhje me agjërimin?
- “Muajin Ramazan, përveç nëse shton diçka vullnetarisht.”
- Më trego çka më ka obliguar Allahu në lidhje me zekatin?
Dhe, pasi i Dërguari i Allahut ﷺ ia tregoi rregullat e Islamit, ai tha: “Betohem në Atë që të ka nderuar se as do të shtoj gjë, as do të lë mangët këto që m'i ka obliguar Allahu.”
Pastaj i Dërguari i Allahut ﷺ tha: “Do të shpëtojë, nëse e ka përnjëmend, - ose ka thënë: Do të hyjë në Xhenet, nëse e ka përnjëmend -.”