Hadithet e ngjashme me hadithin 282

Muhamed ibn Selami na ka thënë: Na ka rrëfyer Ebu Muaviu, e këtij i ka treguar Hishami, e ky nga babai i vet, e ky nga Zejnebja, e bija e Umu Selemes, se Umu Seleme (Allahu qoftë i kënaqur me të!) ka thënë: “Umu Sulejmi erdhi tek i Dërguari i Allahut ﷺ e i tha: “O i Dërguari i Allahut! Allahu nuk turpërohet nga e vërteta: (andaj) nëse femra ejakulon në gjumë, a i obligohet gusli?”
Pejgamberi ﷺ tha: “Nëse sheh se është lagur.”
Atëherë Umu Seleme e mbuloi fytyrën e saj dhe tha: “O i Dërguari i Allahut! A edhe gruaja ejakuluaka?”
- “Po, t'u pluhurosshin duart, e si do t'i ngjante fëmija asaj?” - tha Pejgamberi ﷺ.”

Abdullah ibn Jusufi na ka thënë: Na ka rrëfyer Maliku, e ky nga Hisham ibn Urve, e ky nga babai i vet, e ky nga Zejnebe bint Ebu Seleme se Umu Seleme, nëna e besimtarëve (Allahu qoftë i kënaqur me të!), ka thënë: “Umu Sulejmi, gruaja e Ebu Talhait, erdhi te Pejgamberi ﷺ dhe i tha: “O i Dërguari i Allahut! Allahu nuk turpërohet nga e vërteta. Andaj, a i obligohet femrës gusli nëse ejakulon në gjumë?” Pejgamberi ﷺ i tha: “Po, nëse sheh se është lagur.”