Hadithet e ngjashme me hadithin 1205

Ebu Mameri na ka thënë: Na ka treguar Abdulvarithi, e këtij i ka treguar Abdulazizi se Enesi (Allahu qoftë i kënaqur me të!) tregon: “Pejgamberi ﷺ nuk doli (në xhami) tri ditë rresht (gjatë kohës sa ishte në sëmundjen e vdekjes). Një ditë, u thirr ikameti për namaz, e Ebu Bekri doli t'u printe njerëzve. I Dërguari i Allahut ﷺ e ngriti perden (e shtëpisë), aq sa ia pamë fytyrën. Nuk kishte asnjë pamje më të dashur për ne sesa fytyra e Pejgamberit ﷺ. Ai ia bëri me shenjë Ebu Bekrit për të vazhduar dhe e lëshoi perden. Nuk kaloi shumë kohë, e Pejgamberi ﷺ vdiq (atë ditë).”

Jahja ibn Bukejri na ka thënë: Na ka treguar Lejth ibn Sadi, e ky nga Ukajli, e ky nga Ibn Shihabi se Enesi (Allahu qoftë i kënaqur me të!) tregon: “Teksa muslimanët ishin duke falur namazin e sabahut, u befasuan kur i Dërguari i Allahut ﷺ e zbuloi perden nga shtëpia e Aishes, i cili, me t'i parë të rreshtuar nëpër safa, buzëqeshi. Ebu Bekri deshi të tërhiqej mbrapa për t'u rreshtuar në saf, duke menduar se Pejgamberi ﷺ kishte dalë për namaz. Muslimanët për pak sa nuk e prishën namazin (nga gëzimi për Pejgamberin ﷺ). Por, ai ua bëri me shenjë që ta vazhdonin namazin dhe e uli perden. Pejgamberi ﷺ vdiq në fund të asaj dite.”

Ebu Jemani na ka thënë: Na ka rrëfyer Shuajbi, e ky nga Zuhriu se Enes ibn Malik Ensariu (Allahu qoftë i kënaqur me të!), përcjellësi, shërbëtori dhe shoqëruesi i Pejgamberit ﷺ, tregon se Ebu Bekri ua falte namazin në kohën kur Pejgamberi ﷺ lëngonte nga sëmundja e vdekjes. Një ditë, të hënën, teksa ishim të rreshtuar në namaz, Pejgamberi ﷺ e zbuloi perden e dhomës, na shikoi dhe buzëqeshi. Fytyra i shndriste nga bukuria, sikurse fletë mus'hafi. Kur e pamë Pejgamberin ﷺ, pothuajse e ndërpremë namazin nga gëzimi. Ebu Bekri filloi të tërhiqej për t'u rreshtuar në saf, duke menduar se Pejgamberi ﷺ po dilte për namaz, por ai na bëri me shenjë ta vazhdonim namazin dhe e lëshoi perden. Po atë ditë, Pejgamberi ﷺ vdiq.

Bishr ibn Muhamedi na ka thënë: Na ka rrëfyer Abdullahu, e këtij i ka thënë Junusi, e këtij i ka thënë Zuhriu se Enes ibn Maliku (Allahu qoftë i kënaqur me të!) tregon: “Teksa muslimanët po faleshin të hënën mbrapa Ebu Bekrit, Pejgamberi ﷺ papritmas zbuloi perden e dhomës së Aishes dhe i shikonte duke buzëqeshur, të cilët ishin të rreshtuar nëpër safa. Ebu Bekri u tërhoq prapa, duke menduar se i Dërguari i Allahut ﷺ dëshironte të dilte për namaz. Muslimanët u hamendën për ta ndërprerë namazin, nga gëzimi që ndien kur panë Pejgamberin ﷺ. Por, ai ua bëri me dorë, për ta vazhduar namazin, e lëshoi perden dhe hyri në shtëpi. Pejgamberi ﷺ vdiq atë ditë.”